Pemerindang meseti nitih jalai ti lurus – Betty Bawing

Betty Bawing, peranak asal ari Simunjan siku penanyi Iban ke kala tebilang nengah lagu berentak pop, balada enggau rentak joget.

Penanyi bekulit burak sereta numbas iya peninggi tu chukup rindu macha bup novel lebuh maya lepa.
Iya ngembuan pelajar tikas Diploma ba bidang penerebai bilun tu kebendar anak pengkuan ari lapan iku diri menyadi.

Betty ngembuan sada nyawa ke chukup lunak ditambah enggau pengelandik betanda ayun lundai maya merindang ba atas panggau.

Tu siti ari pengelebih ti dikembuan iya ngujungka iya seruran nerima kangau merindang ba dedini endur laban peminat semampai teperindang sereta enda nemu leju.

Maya dirandau Suara Sarawak, Betty madah album kepenudi digaga diberi nama Tempias dikeluar ba taun 2018.
Album tu dikeluarka dibaruh perabung Golden Pearl Recording Studio (GPRS) asil keranjai jari dua iku penanyi tebilang iya nya Duna Ranggau (Semampai Laku) enggau Lakuang Ading (Semadi Entua).

ALBUM TEMPIAS….Album baru ari Betty iya nya diberi nama Tempias ulih digiga ba sebelah kedai muzik.

ALBUM TEMPIAS

Dalam album Tempias tu bisi lagu hit baka Joget Amu Mata, Dunya Injau enggau Tempias mujur nerima sambut ke chukup manah ari peminat,”ku iya.

Ngelansa pasal pengidup ba dunya pemerindang, Betty madah diri semampai nerima sukung ke nadai bebagi ari bala bakih enggau sida sebilik.

“Ba dunya pemerindang tu, titih aja jalai ti betul sereta lurus sereta anang semina deka ‘glamour’ (tampak rita) aja tang asil kereja nadai kualiti.

“Kitai mega meseti ngembuan ati ti baruh mega anang ngembuan jaku tinggi enda milih sapa-sapa aja enggau begulai baik nya peminat tauka raban pemerindang bukai.

“Lalau pemadu beguna ba aku siku iya nya genap artis meseti nemu nyaga pemanah nama diri kelimpah ngenyauh kediri ari ‘publisiti’ murah,”ku iya ti keterubah nyadi artis rekording ba taun 1998.

DIKERINDU PEMINAT…Album Joget Semaya Puntan entara album ti pemadu dikerinduka peminat.

MAYUH PEMAR DITAPI

Ngelansa pasal pemar ditapi sekumbang nyadi artis pengelama 22 taun iya madah semua pemedis, pemar enggau penguji ti datai nuntung berengkah maya udah terejun ba dunya pemerindang chukup mayuh lalu enda alah dikeingat.

“Pekara nya chukup mayuh, chukup aku aja mih nemu lalu tejuka semua nya nyadi lalau enggau tengau dikena aku terus mansang ke mua.

“Enti ulih aku enggai kelalu berunding pekara ti negatif laban ukai semua orang rindu lebih agi enti kitai mujur ba sesebengkah pengawa ke dikereja.

“Arapka semua kitai bela besampi aja ngagai petara minta berekat ari iya sereta anang ‘jampat angat’ nyema nerima petenah ari orang,”ku iya.

Lebuh ditanya pasal batang pengawa kelimpah ari merindang, Betty madah, nyentuk sehari tu iya agi gawa ba sebuah serikat luyar ba Kuching.

Iya mega sebedau tu kala gawa nyadi penari ba Dayak Cultural Foundation (DCF).

“Lebuh gawa nyambil nyadi penari ba DCF suba aku suah diinjau orang belagu ti ngujungka aku ngemaduka diri nyadi penari.

“Taja pia aku mengkang gawa ba kompeni alai aku gawa diatu,”ku iya.

MERINDANG…Kelimpah belagu Betty mega landik betanda.

PENGAWA NYERUMBA PKP

Nyerumba Atur Tagang Pejalai (PKP) ketegal penyakit Covid-19 diatu aku diasuh kompeni semina gawa ari rumah.
Nya alai, atur tu meri awak ngagai aku mayuh awak begulai enggau diri sebilik enggau ngereja bemacham pengawa ba rumah.

“Awak lepa nyerumba PKP tu, aku bisi nguji nyumai bansa pemakai ngena resepi pemadu baru ke dipelajar ari bup sereta bemalikan media rama baka facebook,” ku iya.

Udah nya, ngelansa pasal juluk ati, dia Betty madah sebaka enggau pemerindang bukai, iya deka terus merindang seagi nerima timbal ke chukup manah ari bala peminat selampur menua.

BETTY BAWING