KOTA SAMARAHAN: Palan Berubat Penyakit Berampit Sarawak (SIDC) ke beungkus RM200 juta disadang deka beroperasyen ba taun 2024.

Menteri Pelajar, Sains enggau Pansik Teknologi Datuk Amar Micheal Manyin Jawong madahka SIDC ti di Kota Samarahan nya ngembuan pemesai tanah 40 ekar.

“Palan tu ukai semina beguna ngagai kitai tang mega ngagai Malaysia dalam nagang pengerekai pandemik.

“Pandemik ti kepenudi nuntung dunya iya nya Flu Spanish lalu diatu Covid-19, ngarapka 100 taun ti deka datai nadai agi pandemik nyadi ngujungka palan tu ila semina nyadi palan pansik aja,” ku iya.

Manyin bejaku munyi nya rambau Program Nasih Tanah SIDC dampih Palan Tungkul Atau Menua (IJN) ditu, ensana.

Ku iya, tuju palan nya ditumbuhka endang dikena nambahka pansik penyakit berampit, ngadang Sarawak enggau pengulih sereta kapasiti nguji ubat, vaksin enggau keresa ejen berampit.

Kelimpah ari nya, iya madah, palan tu mega deka nyikap Sarawak ngelala tumu, mutarka enggau melaba pengerekai penyakit berampit ti deka datai.

“Nya ngujungka kerejasama enggau Opis Menteri Pengerai dalam napi penyakit berampit di Sarawak ulih diputar lengkas,” ku iya.

Iya nerangka, SIDC tu ila deka meri perati ngagai dua pekara pemadu beguna.

“Keterubah SIDC deka ngemansangka kapasiti enggau penau dalam ngelala pandemik ba maya ti deka datai enggau pengeruga ti ayan nengah pemansang modal mensia enggau pansik ti meri pangka besai.

“Kedua nyalin pansik bio-berubat dalam aplikasyen baka perengka diagnostik, berubat enggau vaksin,” ku iya.

Iya andalka pekara tu terus disukung rayat Sarawak ngambika Sarawak ulih nerima pemaik sereta rayat ulih ngulihka nerima pangka penatai pemisi ekonomi ti tinggi.