Enam agi Stesyen Ngisi Hidrogen digaga

KUCHING: Perintah Sarawak deka numbuhka enam agi Stesyen Ngisi Hidrogen dikena nangkup peminta sektor perengka pengangkut ba menua tu.

Kepala Menteri Datuk Patinggi Abang Johari Tun Openg madah, stesyen nya deka ditumbuh ba Kuching (dua unit) sereta bela seunit di Sri Aman, Sibu, Bintulu enggau Miri.

“Asil pansik tu deka mantu kitai nyingkang ke mua kelimpah sel hidrogen meri pengelebih ngagai Sarawak ngerebut peluang eksport ngagai makit dunya.

“Kitai benung nguji tiga bas hidrogen ba jalai alun nyadi sebagi ari pansik sentang bahan api tu di baruh Kaunsil Pemansang Ekonomi Sarawak (SEDC),” ku iya.

Iya mansutka jaku nya lebuh bejadi Randau Kuasa Ulih Dikena Baru (Saref) diatur Sarawak Energy Berhad (SEB) ba Palan Aum Borneo Kuching (BCCK) ditu tadi.

Ku Abang Johari, SEB enggau kerejasama Linde mega numbuhka Loji Pemansut Begulai enggau Stesyen Ngisi Hidrogen keterubah ba Asia Tenggara di Kuching taun tu.