KUCHING: Sepenyampau 100 iku nembiak enggau anak patu balu ti kurang penatai pemisi dirami dalam Program Bebeli Baju Raya Gerempung Pengimport enggau Pengeluar Perengka Pengangkut Melayu Malaysia (PEKEMA) Sarawak nengah baucher beungkus RM240 siku.
Program ti diatur PEKEMA Sarawak ba AEON Mall Kuching Central nya dipenyadi Menteri Pemansang Orang Indu, Ruang Bilik enggau Komuniti, Datuk Seri Nancy Shukri.
Lebuh bejaku, Nancy muji pengeransing PEKEMA ngatur pengawa mantu orang ti begunaka bantu sebedau pengerami Hari Raya Aidilfitri ti deka diintu enda lama da.
“Program tu siti inisiatif manah ti mandangka pengibuh raban tuai gerempung dikena nyaup nembiak ti kurang penatai pemisi.
“Aku meri besai terima kasih ngagai PEKEMA Sarawak ti diulu ke Presiden iya, Datuk Ismail Abang Saufi, ti udah ngatur program tu,” ku iya.
Nancy bejaku munyi nya rambau Program Bebeli Baju Raya PEKEMA Sarawak begulai enggau nembiak kurang penatai pemisi ba Aeon Mall Kuching Central ditu, tadi.
Ku iya, sekeda nembiak ti dirami kemari dikelala nengah kerejasama enggau Opis Pengintu Pengelantang Pendiau Raban Bansa (JKM).
“Ba program tu, genap iku penerima nerima baucher bebelika barang ti berega RM240 ngambi sida ulih milih kereban pengerami Hari Raya Aidilfitri kediri empu.
“Chara ‘Raya Shopping’ tu chukup besai reti laban bala nembiak ukai semina nerima bantu aja, tang mega bisi peluang milih pekayan tauka utai ti diguna rambau pengerami Hari Raya kediri empu.
“Peneleba nya ulih meri pengaga ati ngagai sida nengah chara gaga ngintu Syawal ti deka datai,” ku iya.
Iya mega madah ke pengawa baka tu ukai semina ngelempung tating belanja ruang bilik tauka pengibun, tang mega mai pengaga ngagai bala nembiak ti dirami.
Iya mega ngelalau bala nembiak ngambi terus ransing ngemansang pelajar sereta anang ngetu ngamatka mimpi sida ungkup pengidup ti menyana agi dudi hari.






