11 chalun Dun PRS nadai berubah

KUCHING: Parti Rayat Sarawak (PRS) naka ulih ngetanka semua 11 penuduk Adun nyengkaum enam penuduk Parlimen ungkup GPS, nyema Pengawa Bepilih Besai Nengeri (PRN12) enggau Bepilih Besai Parlimen (PRU15) diatur sereta dalam taun tu.

Presiden iya Tan Sri Dr James Jemut Masing madah tau nyadi pengawa bepilih besai diatur taun tu baka ke udah disebut Kepala Menteri, pia mega perintah besai nyangka deka ngatur nya sereta iya nya PRU15 enggau PRN12.

“Semua kaban kitai (PRS) nengah aum sehari tu (kemari) setuju awakka PRN tu sereta enggau Pengawa Bepilih Besai Parlimen, ” ku iya madah ngagai pemberita pengudah betuaika aum ninting bulan PRS di Indu Opis PRS ditu kemari.

Masing mega madah, PRS nyemetak deka ngetanka chalun 11 penuduk Dun sebedau tu iya nya iya empu ba Baleh, Keneddy Chuk Pai di Murum , Datuk Liwan Lagang (Belaga), Wilson Nyabung (Pelagus), Alexander Vincent (Ngemah), Datuk John Sikie (Kakus), Christopher Gira (Tamin), Majang Renggi (Samalaju), Malcolm Musen Lamoh (Batang Ai), Datuk Mong Dagang (Bukit Begunan) enggau Datuk Snowdan Lawan (Balai Ringin).

Ku iya, diatu PRS deka mantaika nama chalun ba empat penuduk Parlimen di sitak Lubuk Antu, Julau, Selangau enggau Sri Aman, kelimpah ba sitak Ulu Rajang PRS ke udah bisi chalun iya nya Datuk Wilson Ugak Kumbong enggau Kanowit (Datuk Aaron Ago Dagang).

BAUM…Tan Sri Dr James Jemut Masing (dua kiba) nyaut tanya pemberita pengudah tembu aum ninting bulan PRS di Indu Opis PRS ditu, kemari.

“Ungkup chalun tu kami semina mantaika nama ari kaban PRS aja, udah nya Kepala Menteri deka milih, kami enda ibuh nurun ke Kuala Lumpur ngulihka pemutus sekalika dikemendar tauka enda ngena lambang GPS baka maya jeman BN suba.

“Kitai diatu deka bediri minta pilih ngena tiket GPS, ngena lambang GPS lalu kitai udah sedia napi pengawa bepilih besai,”ku iya.

Iya ke mega Adun Baleh madah ex-kaban PKR Jugah Muyang bisi madah diri nyukung GPS enggau PN, lalu piak kami udah meri iya awak nentuka pemutus diri.

“Atur kitai mudah, Lubok Antu endang sitak PRS lalu semina kaban PRS ulih nyadi chalun ba sitak nya lalu pemutus tu ditentuka Kepala Menteri, kitai nadai hak ningkah pemutus iya.

“Tambah mega ari sukut belanja tentu bisi pemar ba pengawa bepilih deka datai, kitai sedar bisi atur ke patut dititih ba sentang pekara nya nyengkaum penyampau belanja ke deka diguna.

“Taja pia kitai andal ulih ngamatka peminta rayat Sarawak, Nya deka nyadi puku ke pemadu manah kitai napi pengawa bepilih besai tu ila,” ku iya.

Tandu iya semua pekara ke dibanti sebedau tu udah enggau deka dikenatai ngagai rayat lalu pengundi ku iya ngaku PKR, DAP enggau PSB entara tim kuat ke deka disatup ba pengawa bepilih tu ila.

Suara Sarawak