MIRI: Bisi 119 nembiak ari ruang bilik indai tunggal nerima bantu kereban nyengkaum bayar sekula ari kaban Kelab Sosial enggau Pengintu Pengelantang Harmoni Miri.
Kelab nya endang suah mantu bala indai tunggal ari sukut pengintu pengelantang enggau pelajar anak sida ninting taun.
Menteri Pengangkut, Datuk Seri Lee Kim Shin madah, gerempung tauka kelab ngesan pangku pengawa besai nyadi pelasar ngumpul enggau ngenataika isu ngagai raban bekaul.
Iya madah, kelab sosial enggau pengintu pengelantang nya berengkah ari 20 taun ti udah ngesan pangku pengawa besai ba pengawa ngaul enggau ngintu pengelantang kaban sida.
“Aku bela nerima bemacham ripot enggau sebana ari indai tunggal laban sida enda ulih mayar tambang bas sekula bala anak sida tang nengah kelab tu, penanggul sida ulih diputar.
“Aku beterima kasih ngagai Chairperson Kelab Sosial enggau Pengintu Pengelantang Harmoni Miri ti udah meri bantu kereban enggau bayar sekula ngagai ruang bilik indai tunggal ba sitak tu,” ku iya.
Kim Shin mansutka jaku nya ba sebengkah penerang Unit Komunikasyen Perintah Sarawak (UKAS) rambau Pengawa Nyuaka Bantu Kereban Sekula Ngagai Indai Tunggal diatur Kelab Sosial enggau Pengintu Pengelantang Harmoni Miri ditu, kemari.
Iya ti nyadi penaung kelab nya madahka diri temegah enggau pengerembai manah ti dipandang kelab nya.
