BINTULU: Polis udah ngenuku pengawa nadai beradat sekeda raban ti nyengkubang pendam Kristian Sungai Bagiau ditu, empai lama.
Ba penusah nya, bisi 12 pendam dia udah disengkubang mensia ti nadai penyinu enggau adat basa ngagai sebayan enggau kaban belayan sida.
Tuai Polis Pelilih Tatau, Deputi Superitendan Polis (DSP) Jame Reis madah, semua pendam nya bisi bekau diluyang enggau penalam entara 0.6 ngagai 0.9 meter muak ari pala tetiap pendam nya.
Pengudah diperesa ku iya, bisi 11 pendam enggi orang indu seraya sebuah da pendam orang lelaki ti kena sengkubang.
“Tanah pendam tu nadai orang nyaga lalu nadai pagar. Ripot mega udah diklasifikasyen kes nyerungkai pendam.
“Kes tu deka dipansik di baruh Seksyen 297 Kanun Keseksaan,” ku iya ba sebengkah penerang tadi.
Dulu ari nya, Indu Opis Polis Pelilih Tatau bisi nerima ripot pasal penusah ke nyadi kena 22 Oktober tu tadi sebedau bejalaika pansik dikena ngelala sida ke ngereja pengawa enda beradat nya.
Ku Jame, takah penyauh ari Pasar Tatau ngagai tanah pendam urung setengah jam pejalai nengah jalai sungai lalu nadai sebarang jalai darat ngelawa endur nya.
“Kes tu agi dipansik. Nya alai, aku ngelalau mensia mayuh anang ngaga sebarang peragam pasal penusah ke nyadi tu.
“Taja pia, enti sema kita bisi sebarang penerang pasal kes tu, kita tau ngelawa balai polis tauka telefon ngagai pegawai pemansik kes Sarjan Tan Ah Phin nengah lumur 013-5465743,” terang iya.
