13 Mei : Jasa raban penyaga pengelikun patut dikeingat

KUCHING: Penyarut ti kala nyadi kena 13 Mei 1969 patut diseliah lalu beguna amat genap iku kitai ingatka pangka penyadi nya ngagai menua kitai.

Presiden Gerempung Veteran Soldadu Kor Renjer (PVTKR) Leftenan Kolonel (B) Mohd Melintang Abdullah madah sejarah bepun ari penyadi 13 Mei nya endang patut dikeingat.

“Tiap iku sida ke nyaga pengelikun sereta bala Veteran Ranger Corp ngagai Loyal Ranger Batallion keterubah tauka suba dikelala enggau nama Sarawak Renjer patut dikeingat sereta diberi basa.

“Sida tu meh orang ke diasuh nyaga pengelikun rambau penyarut nyadi entara Melayu China di Kuala Lumpur sereta nadai bepiak ngagai sapa-sapa,” ku iya madah nengah siti penerang.

Nangkanka nya, ku iya, penyarut ti kala nyadi di Kuala Lumpur nya siti penusah ti ngujungka mayuh orang bebadi nyawa.

“Penyerakup bepun ari mayuh macham bansa ti nyadika kitai siti menua ti likun.

“Aku chukup temegah laban agi bisi raban veteran PVTKR ti sama dalam ngerara penyarut tu, meruang dikeingat nyentuk ke sehari tu,” ku iya.

Nangkan nya ku Melintang, enggau tu iya meri besai terima kasih sereta basa ngagai tiap iku veteran PVTKR laban ti udah bebendar nyaga menua kitai sereta ninggalka pengingat ngagai tiap iku rayat menua tu.