SARIKEI: Bisi 1,300 nembiak Sekula Sekondari (SMK) Sungai Paoh diberi penerang enggau peneleba pasal pengelikun penusah angus nengah program latih penusah angus diatur Balai Bomba enggau Penyah Penusah (BBP) Sarikei, pagi tadi.
Tuju program tu diatur ngambi meri penyedar ngagai nembiak enggau raban sekula pasal chara nagang penusah angus enggau pengawa patut dikereja enti penusah ngenyit nyadi.
Tuai Balai Bomba enggau Penyah Penusah Sarikei, Mahmudin Narudin madah, bemacham aktiviti diatur sepanjai program nya nentuka nembiak gagit belajar penemu bomba.
“Terima kasih ngagai raban sekula laban udah meri kerejasama manah sepanjai program tu diatur.
“Tambah mega, semua penyereta udah meri timbal ti chukup positif bekaul program tu.
“Program tu sebagi ari aktiviti besai bomba Sarikei ba pengawa meri penyedar ngagai mensia mayuh pasal chara nyikap diri napi penusah angus,” terang iya.
