14 hari nadai kes positif, Bintulu pulai nyadi zon gadung

KUCHING: Bintulu betukar nyadi zon gadung kemari pengudah nadai ngerikodka kes positif baru Covid-19 dalam kandang 14 hari ti ngujungka zon kuning diatu semina tinggal dua iya nya Kuching enggau Sibu.

Komiti Penyaga Penusah Ngenyit Nengeri (JPBN) dalam siti penerang media kemari madahka, nadai kes positif baru Covid-19 dirikodka di Sarawak lalu kes positif di menua tu mengkang 571 kes.

Pia mega, JPBN madahka bisi siti kes baru suman enggau dischaj ari sepital ti ngujungka kes suman enggau pansut ari sepital nambah 546 iku.

Berebak enggau nya, ku JPBN bisi lapan iku pesakit agi berubat ba wad isolasyen sepital lalu penyampau kes pemati ketegal Covid-19 mengkang 17 iku.

Bisi enam iku pesakit agi dipatau (PUI) lalu lima kes agi nganti pemutus makmal.

JPBN madahka nyentuk kemari bisi 2,154 premis udah dipatau nyengkaum pasar besai, restoran, kilang, bank, opis perintah, rumah sembiang enggau ke bukai.

Nangkan nya, bisi 1,084 buah kerita udah diperesa ba Op Benteng di lima buah pelilih iya nya Lundu, Bau, Serian, Sri Aman enggau Lubok Antu.