INDUN SILONG
Suarasarawak.news@gmail.com
KUCHING: Sepenyampau 149 nembiak ari Sekula Sekondari (SMK) Bakong ngambi bagi ba Kem Nyadi Tuai Nembiak SMK Bakong 2025.
Program nya diatur Komiti Pemansang Modal Mensia enggau Menua sekula nya empu nengah kerejasama begulai Kolej Sarawak Skills Miri.
Nangkan nya, program ti diatur dua hari berunggu kena 16 nyentuk 17 April nya diatur ba kandang sekula nya empu baka balai, palan gim enggau padang.
Penyeraris program, Pengajar Reslynna Sawing madah, program nya diatur dikena nempa modal mensia ti bepenau bejalaika pengawa sereta mantu ngelancharka agi atur sekula.
“Ba pengujung program, kami andal bala penyereta ulih mantai penau ti dikembuan sida di sekula.
“Kami mega deka matih bala penyereta ngena sekeda penau enggau penemu ti patut dikembuan siku nembiak lebuh nyadi tuai dudi hari,” ku iya.
Reslynna madah, kelimpah ari nya, sida andal bala penyereta bulih motivasyen enggau pengeleda dikena napi pemar maya besekula enggau nyaga ulah lebuh ngatika diri dudi hari.
