KUCHING: Sepenyampau 153 nembiak ba Gerempung Autistik Kuching (KAA) nerima bantu pemeri Krismas ari Kaunsil Pemansang Ekonomi Sarawak (SEDC) serimbai pengerami Krismas enda lama agi.
Genap nembiak nerima kantung pemeri ti ngundan barang ari rintai juluk ati sida sereta bantu mata duit RM50 dikena ngerichahka agi Program Love-In-A-Box.
Chairman SEDC, Tan Sri Datuk Amar Abdul Aziz Hussain madah, program nya sebagi ari inisiatif Tanggungpengawa Sosial Korporat (CSR) sida dikena bekunsi pengaga Krismas ngagai genap serak komuniti.
Nya nyengkaum sida ti napi Penanggul Spektrum Autisma, Cerebral Palsy, Development Delay, Syndrome Down enggau Bepenanggul Intelek.
“Program tu ditumbuh laban bisi raban kami kurang benasip sereta patut diberi perati enggau sukung tambah kelebih agi maya musin Krismas tu.
“Laban ti nyadi entiti korporat ti dinamik enggau optimis mansang ke mua, udah tentu tu sebagi ari polisi enggau falsafah kami meri baru ngagai komuniti.
“Semua sida ti kurang benasip manah bisi hak ngasaika pengelantang sereta dikesayau baka orang bukai,” ku iya.
Abdul Aziz mansutka jaku nya rambau Program Love-In-A-Box ti diatur ba KAA ditu, sehari tu.
Pia mega, iya ngemerat pangku pengawa SEDC ti deka ngelempung nasip raban kurang benasip dalam komuniti nengah bemacham program.
