KUCHING: Pemansang Tanah Hak Adat Bansa Asal (NCR) terus nyadi inisiatif ti beguna dalam usaha nambah pengelantang enggau ngangkat tikas idup peranak di menua pesisir.
Menteri Industri Pemakai, Komoditi enggau Pemansang Kandang Menua Sarawak, Datuk Seri Dr. Stephen Rundi Utom madah, naka diatu, 153,000 hektar tanah NCR udah dikemansang nengah pengawa nanam sawit ke ngangku 42,500 iku pengempu tanah di serata Sarawak.
“Perintah deka ngatur mayuh agi randau tetap dikena meransang penyereta ti mayuh agi ari pengempu tanah NCR, sereta nambah pemereti ati sida senentang penguntung ari pengawa ngemansangka tanah tu.
“Nengah program pemansang tanah Kaunsil Penyerakup enggau Pengintu Tanah Sarawak (SALCRA), bisi 28,321 lot tanah — tauka 89 peratus ari 31,777 lot ti dikemansang — udah disukat,” ku iya.
Rundi bejaku munyi nya rambau Nyimpul Jurai Opis Menteri Industri Pemakai, Komoditi enggau Pemansang Kandang Menua ba Aum Kunsil Nengeri (DUN) Sarawak Ke-19 ditu, kemari.
Ku iya, ari penyampau nya, bisi 19,448 lot — tauka 69 peratus — udah diberi geran pala tanah ngena Seksyen 18 Kanun Tanah Sarawak.
“Opis menteri mega benung bekerejasama rat enggau Opis Tanah enggau Survei dikena ngerumban proses ngeluar geran tanah ti agi bedau tembu.
“Ari sukut bayar asil, SALCRA udah ngemendar bayar asil beresi penyampau RM36 juta ba taun 2025.
“Bayar nya deka meri penguntung ngagai pesereta ari baruh kandang endur ti produktif sereta meruan, enda nyengkaum blok pemansang baru, kandang endur nanam baru tauka kandang endur ti enda meri asil,” ku iya.
