SARIKEI: Bisi 164 pengereja pengawa perintah ari 17 bengkah opis enggau ejensi nerima Pingat Perkhidmatan Setia ba Pengawa Nyua Pingat Perkhidmatan Setia di Bagi Menua Sarikei.
Pengawa nya dipenyadi Premier Sarawak, Datuk Patinggi Tan Sri Abang Johari Tun Openg lalu diatur ba Balai Opis Pengatur Perintah Sarawak (Bagi Menua Sarikei), lemai kemari. Pengawa nya nyadi Pengerami Nyua Pingat Perkhidmatan Setia Keenam diatur ungkup taun 2026.
Semua 164 penerima ti dikangau iya nya pengereja pengawa perintah ari 17 opis enggau ejensi perintah iya nya 11 opis ari baruh Perintah Nengeri enggau enam opis ari baruh Perintah Besai. Pingat Perkhidmatan Setia diberi dikena ngaku orang gawa perintah ti udah ransing gawa sepengelama 37 taun enggau lama agi.
Sekeda penerima pingat ti dirintai iya nya Philip Sanjan ari Opis Betanam Betupi Sarawak ti udah gawa sepengelama 37 taun. Sama bisi nerima pingat basa tu iya nya Abdul Latip Osen ari Opis Pengerejister Bansa Sarawak ti udah gawa sepengelama 37 taun.
Kelimpah ari nya, Dacy Christopher Ugot ari Opis Pelajar Sarawak mega dirintai nyadi penerima pengudah ngerikod timpuh servis sepengelama 37 taun. Pengawa tu mandangka pengaga ati perintah ngagai jasa enggau pemeri orang gawa perintah ti udah gawa enggau meri komitmen sekumbang sida meri servis ngagai menua.
Pengawa ngatur pengerami tu mega nyadi kelai ngaku penaluk enggau pengeransing pengereja pengawa perintah ngenataika servis ngagai rayat sereta nyukung pemansang nengeri enggau menua
