167 peranak Rh Lepang, Sayat lengis reta tengkira

LUBOK ANTU: Chukup sinu beratika penusah ke nuntung 167 iku peranak Rumah Lepang, Sayat ditu lengis reta tengkira pengudah rumah panjai sida angus lemai tadi.

Sapit Direktor Operasyen Opis Pengerara Api enggau Penyah Penusah Malaysia (JBPM) Penguasa Bomba Kanan 1 (PgKB I) Tiong Ling Hii madah nadai penusah bebadi nyawa tauka telih nyadi lebuh penusah nya nyadi.

Lebuh nerima kangau urung jam 1.38 lemai bekaul enggau penusah nya, sepenyampau 12 iku raban bomba ti diketuaika PPgB William Bareng nuju ngagai rumah panjai nya.

Ku Tuai Rumah Lepang anak Gerang, penusah nya nyadi bepun ari bilik lumbur dua rumah panjai nya.
“Pengawa madam api dikerumban ngena empat unit perengka madam api.

“Taja pia api nyerekai enggau jampat alai kami enda ulih ngerara api nya,” ku iya.

ANGUS… Rumah Lepang, Sayat Engkilili enggau pemanjai 26 pintu dituntung penusah angus lemai tadi.

Nitihka penerang, pengudah raban JBPM Sri Aman datai ba rumah panjai nya, rumah panjai ti ngembuan 26 iti pintu bilik nya nyau abis diempa api.

Balai bomba enggau penyauh 46 kilometer ari rumah panjai nya enggau pejalai penyauh sejam lebih sereta jalai ti sekut enggau beselikuh meri penanggul raban bomba datai ba palan nya enggau jampat.

Kelimpah ari nya, penanggul ngulihka sumber ai ti jauh ari sungai mega nyadi penanggul operasyen raban bomba ngerara api ti nyadi ba rumah panjai nya.

Operasyen madamka api tembu ba jam 6.29 lemai lalu kebuah kebendar penusah angus nya nyadi sereta ungkus pengerugi agi dalam pansik.

SINU…Pendiau rumah panjai Sayat semina tinggal tiang bekau ari penusah angus.

 

Suara Sarawak