170 katun insap nadai chukai dirampas

MIRI: Sepenyampau 170 katun insap nadai chukai kastam dirampas rambau operasyen dipejalai ba sebuah kedai, ditu kemari.

Rega insap dirampas RM24,672 asil Op Andai Polis Marin Wil Lima ba sebuah kedai besemak simpang Batu Niah.

Komander iya, Asisten Komisioner Shamsol Kassim madah, asil diperesa urung pukul 1 lemai nya udah tetemuka bemacham bansa insap disimpan dalam kedai nya.

“Semua insap ti diperesa enggau dijual dipelaba nadai chukai kastam lalu tu penyalah di baruh Akta Kastam 1967.

“Kami mega ngetanka pedagang dikena bejalaika pansik silik pasal kes nya,” ku iya ba penerang kemari.

Iya nyemetak madah, bala pedagang ditangkan enda bejualka barang nadai chukai.

“Pengawa nyual barang nadai chukai tu ngelanggar undang-undang lalu sida ulih kena ukum enti ditemu salah.

“Piak kami deka seruran matau enggau bejalaika operasyen nagang enggau ngemunas penyalah mai insap chara belalai ti majak nyadi,” ku iya.

Mensia mayuh ti bisi penerang pasal sebarang pengawa baka tu dipinta meri kerejasama tauka telefon ngagai piak bekaul ba lumur 082-334111.

DIRAMPAS… 170 katun insap mujur dirampas dalam Op Andai Polis Marin Wil Lima ba sebuah kedai.

Suara Sarawak