KAPIT: Perintah Sarawak deka ngambi semua jalai batang di Kapit urung 1,700 kilometer (km) pemanjai ti deka diadu ngena chara berenggat kandang lima ngagai enam taun ti deka datai.

Premier Sarawak, Datuk Patinggi Tan Sri Abang Johari Tun Openg madah, jalai nya diadu dikena ngemanahka rentayan jalai penyambung ti meruan agi ba menua pesisir.

“Perintah nengeri diatu benung berundingka pengawa ngaduka jalai alun, sekali ke nya bisi status jalai Perintah Besai tauka jalai nengeri.

“Di Kapit, bisi urung 1,700 km jalai batang udah dirikod ba sitak tu, tang diatu jalai nya bisi ti enda ulih ditengah rayat ketegal nadai pemendar ari kompeni tauka enti deka nengah jalai nya, sida dipinta mayar,” terang iya.

Abang Johari nerang pekara nya rambau bejadi Program Sarawakku Sayang di Kapit ditu, kemari.

Ku iya, pengawa baka nya udah ngenusahka peranak menua pesisir kelebih agi genturung pendiau rumah panjai ti bepanggai ba jalai batang lebuh mindah ngagai kandang menua bukai.

“Kabinet Sarawak udah netapka perintah nengeri deka ngambi semua jalai batang di nengeri tu.“Rentayan jalai batang di Kapit aja urung 1,700 km, inisiatif nya deka disambung ngagai kandang menua Baram ti ngembuan rentayan jalai batang ti panjai agi.“Semua jalai ti deka diadu berenggat kandang lima ngagai enam taun,” ku iya.

Abang Johari madah, pengudah jalai diambi perintah nengeri, rayat ulih nengah jalai nya tauka enda ibuh bebayar agi dudi hari.

Iya mega madah, jalai ti udah diadu tu ila deka disambung enggau jalai besai, ngambi ulih besambung ngagai komunikasyen enggau pemansang di menua pesisir.

Ku iya, pengawa bejalaika projek nya begunaka agih belanja ti besai lalu pekara nya deka diatur Sapit Premier Sarawak ti mega Menteri Pekara Wang enggau Ekonomi Baru Kedua, Datuk Amar Douglas Uggah Embas.

Iya madah, pengulih perintah nengeri bejalaika pengawa tu bekau ari tambah penatai pemisi nengeri ti majak manah kenyau ari iya mangku pangku pengawa nyadi tuai di nengeri tu.