SARATOK: Kaban Kunsil Nengeri (ADUN) Krian, Friday Belik ngagihka lebih RM3.4 juta sum ngagai 1,762 pekebun mit ti dikemendar Perintah Sarawak nengah Ejensi Pemansang Bagi Menua Betong (BDDA).
Ku iya, sepenyampau RM2,612,900 dikena ungkup bantu sum sawit ti diterima 1,325 pekebun mit sawit. Seraya, RM866,571 dikena ungkup bantu sum lada ti diterima 437 pekebun mit lada.
“Semua bantu betanam betupi tu deka diagih berenggat belabuh kemari,” ku iya.
Friday mansutka jaku nya ba Pengawa Nyuaka Bantu Betanam Betupi BDDA di Opis Betanam Betupi Saratok, ditu ensanus.
Iya ngelalau bala pekebun ngena sum tu enggau manah. “Kena manah sum tu lalu anang salah guna kelebih agi anang nyual sum tu. Aku andal ke enti dikena manah, bantu tu ulih ngelempung tating belanja bala pekebun mit,” terang iya.
Tebal agi, bala pekebun mit ti nerima bantu berasai lantang ati lalu meri besai terima kasih ke penyiru Perintah Sarawak. Pegawai Opis Betanam Betupi Saratok, Duat Gayok mega bisi datai.
