BELADIN: Sepenyampau 21 projek pemansang fasiliti Polis DiRaja Malaysia (PDRM) ti dikemendar di Sarawak sereta benung dipejalai ba mayuh renggat.
Direktor Opis Logistik enggau Teknologi Bukit Aman, Komisioner Polis (CP) Gilberd Philip Layang madah, nya bukti komitmen betampung PDRM negap infrastruktur, nambah pengasi operasyen sereta nentu pengelantang enggau pengelikun pegawai enggau raban polis seruran tejamin. Kelimpah ari nya, iya madah, nya mantu negap pengelikun rayat di selampur Sarawak.
“Naka diatu, sepenyampau 21 projek pemansang fasiliti PDRM udah dikemendar lalu benung dipejalai di selampur Kontinjen Sarawak.
“Tu mungkur pengawa ngaga Indu Opis Polis Kontinjen (IPK) Sarawak, tiga Indu Opis Polis Pelilih (IPD), tiga balai polis, dua langkau polis, semilan batalion enggau pos Pasukan Gerakan Am (PGA), penyangkai bilun enggau fasiliti sukung sereta siti tanah ungkup ngaga IPD,” terang iya. Gilberd bejaku munyi nya lebuh bejadi Balai Polis Beladin ditu, kemari.
Terang iya, rintai projek dikemendar nyengkaum IPK Sarawak (RM521.5 juta), IPD Belaga (RM89.8 juta), IPD Kapit enggau rumah (RM150 juta) sereta IPD Dalat enggau rumah (RM79.82 juta).
“Pia mega, Balai Polis Matang Jaya, Padawan (RM24.646 juta), Balai Polis Lachau (RM40.7 juta), nyeruri Balai Polis Sematan di IPD Lundu (RM2 juta), nyeruri Langkau Polis Pendam di IPD Limbang (RM1 juta) sereta nyeruri Langkau Polis Long Semadoh (RM1 juta).
“Projek bukai baka Kem Batalion 10 PGA Sarikei (RM212.43 juta), tujuh pos PGA (Kalbar) sepenyampau RM28 juta, nyeruri Kubu Pertahanan Pos PGA Telok Melano di Lundu (RM242 juta), nyeruri Kubu Pertahanan Pos PGA Tebedu (RM242 juta), nyeruri Kubu Pertahanan Pos PGA Bunan Gega (RM242 juta), nyeruri Kubu Pertahanan Pos PGA Merirai (RM236.5 juta) enggau nyeruri Kubu Pertahanan Pos PGA Long Banga, Ulu Baram (RM242.5 juta).
“Bisi mega projek ngaga begunan peninjau di 10 pos nyaga pengelikun adan PGA Briged Sarawak (RM3 juta), ngaga begunan enggau rumah tambah Batalion 23 PGA Sri Aman (RM205.1 juta), ngaga palan Raban Operasyen Langit (PGU) PDRM Sarawak (RM174 juta), ngaga palan ngengkah enggau muai bahan api ungkup guna nyaga pengelikun adan (RM13.6 juta) sereta tanah IPD Song (RM1 juta).
“Terima kasih ngagai Perintah MADANI berindik ari penyiru sida ngemerat projek ngaga IPD, balai polis enggau kuarters baru kelebih agi di Kontinjen Sarawak ditu,” ku iya.
PDRM, ku iya nyemetak madah, deka terus chakah bejalai tanggungpengawa besai ti udah dilempai ngagai sida ba pengawa nyaga pengelikun enggau pengelantang mensia mayuh. Iya madah, sida mega deka terus nambah tikas kompetensyen raban polis sebarang maya.
“Inisiatif tu mungkur pengawa ngemanah sukut meri servis ngagai komuniti seriris enggau pemansang kemaya hari sereta pengadang rayat ti majak tinggi ngagai kualiti servis perintah.
“Nya alai, aku ngarap semua raban PDRM ulih terus meri servis pemadu manah kelebih agi ngagai komuniti Beladin enggau ngelingi tu.
“Tanggungpengawa ti disan mungkur pengawa nyadi bakih komuniti, mending, mantu, ngembing enggau meri sukung ngagai komuniti lokal.
“Ngarap kitai semua ulih meri servis pemadu manah ngagai komuniti sereta nyadi manifestasyen meri servis bekualiti enggau profesional ngagai komuniti lokal seriris enggau sulu jaku: Polis enggau Komuniti Enda Ulih Diserara,” tampung iya.
Ba lansa bekaul, iya madah, pengawa numbuh Balai Polis Pusa ti baru beguna amat ungkup tuju dudi hari laban balai polis ti endang bisi semina suwa.
Bela datai, Kaban Kunsil Nengeri (ADUN) Beting Maro, Datuk Razaili Gapor, Chairman Gerempung Ruang Bilik Polis (PERKEP) Opis Logistik enggau Teknologi, Siti Manau, Kepala Polis Sarawak, CP Datuk Mohamad Zainal Abdullah, Sapit Kepala Polis Sarawak, Deputi Komisioner Polis (DCP) Saifullizan Ishak enggau Bini, Faisha Ishak sereta Tuai Polis Pelilih (KPD) Betong, Deputi Superintendan (DSP) Wan Mohamad Ali Wan Malek enggau bini, Darmawaty Mohd.
