KUALA LUMPUR: Bisi 213 tiang pemanchar baru ari 864 tiang pemanchar ti diperambu didiri enggau beoperasyen ba baruh Projek Pelin Sambung Digital Menua (JENDELA) ba Sarawak udah ditembu didiri naka suku kedua taun tu.
Sapit Menteri Komunikasyen enggau Digital, Teo Nie Ching madah, naka diatu, 3,689 ari 3,735 tiang pemanchar mega tembu dikemanah seraya 106,331 ari 207,135 udah disedia disambung gentian optik.
Pia mega ku iya, Komiti Besai Komunikasyen enggau Multimedia (MCMC) mega ngena teknologi satelit dikena ngerembai arus Internet kelebih agi ba menua ulu enggau 523 endur udah ngasai servis Internet nengah satelit dikumbai Broadband Wireless Access (BWA).
“Naka suku kedua 2023, peratus aturs 4G ba Sarawak udah nyapai 87.52 peratus.
“Laluh ari genap inisiatif nya disadang tembu berenggat datai ba pengujung taun 2025,” ku iya lebuh nyaut tanya ba Dewan Rakyat, ditu kemari.
Teo nyaut tanya Ahmad Johnie Zawawi (GPS-Igan) ti deka nemu pejalai JENDELA di Sarawak enggau taga projek tembu penuh nyengkaum ba sitak Parlimen Igan.
Teo mega madah, ungkup sitak Parlimen Igan, bisi tujuh ari 14 tiang pemanchar baru udah tembu enggau beoperasyen kelimpah semua 40 stesyen pemanchar ti diperambu diseleti udah tembu penuh.
Ungkup servis jalur lebar online tetap, iya madah, 619 ari 2,791 endur ti diperambu udah sedia enggau sambung gentian optik enggau semua dua palan servis BWA ti diperambu mega udah tembu enggau beoperasyen.
Di baruh tagit JENDELA, Teo madah, MCMC benung ngelanggur chara ti engkeman ngena bemacham teknologi nyendiaka Internet ba sitak ke empai disikap arus Internet.
Ku iya, entara penanggul ti ditapi ejensi nya sereta penyedia servis komunikasyen bejalaika inisiatif ngerembai bungkur Internet ba menua ulu nyengkaum peranak diau ngachir, akses meraka sungai enggau sitak nadai disikap bekal kuasa karan tetap disedia dikena nirika tiang pemanchar.
Nangkan nya, ku iya, projek Point of Presence (PoP) Renggat Keterubah mungkur 60 projek di selampur Sarawak enggau dua ba sitak Parlimen Igan udah tembu dipejalai.
“Ungkup Renggat Kedua ba Sarawak, semua projek mungkur 681 taba lalu naka diatu ti udah tembu baru enam seraya ke bukai, haribulan tembu dipejalai nya 31 Oktober 2025 chara berenggat.
“Ungkup sitak Parlimen Igan, bisi 16 projek udah dirintai lalu nitih padah kunteriktor, sida pechaya ulih nembuka sekeda projek ungkup Parlimen Igan taun tu,” ku iya seraya madahka projek PoP dipejalai berenggat nya 10 peratus ti ulih ditembu taun tu, 50 peratus taun baru enggau 40 peratus agi ditembu taun 2025. – BERNAMA
