24 buah lagu disadaka Masterpiece ba konsert MKB

KUCHING: Masterpiece deka merindang bala peminat mulai ke pengingat lagu Bulat Ati Ku, Sinu, Nadai Benci enggau mayuh agi ba ‘Konsert Masterpiece 1Dekad Merindang ke Bintang (MKB)’ beserimbai enggau 10 taun pengada album MKB.

Ku vokalis Masterpiece Aldrine Phillie tauka tebilang dikangau Depha, bisi 20 ngagai 24 iti lagu deka disadaka sida ba konsert nya ari lagu-lagu tebilang dalam album MKB enggau lagu dalam lima iti album bukai Masterpiece berengkah taun 2009 nyentuk 2019.

“Tuju konsert tu endang deka ngerami album keterubah Masterpiece MKB ti dikeluarka ba taun 2009 udah manggai 10 taun udah beretan dalam industri muzik kitai di menua tu.

“Kenang manis mayuh ba album tu laban mujur bulih anugerah ba Anugerah Muzik Dayak (AMD) iya nya Group Pemadu Popular, Video Muzik Pemadu Manah, Kulit Album Pemadu Manah, Artis Baru Pemadu Manah enggau Album of the Year,” ku iya.

Depha bejaku munyi nya lebuh dirandau pemberita Suara Sarawak, kemari.

SAMPAL DATAI… Konsert Masterpiece 1Dekad Merindang ke Bintang (MKB) beserimbai enggau 10 taun album MKB.

Tandu iya, konsert tu dipelanja TGF Cosmetics Sarawak enggau AMG Event Management lalu disaup M.O Couture Sarawak.

“Sibu dipilih nyadi palan konsert laban Masterpiece beasal ari menua Sibu kelimpah ngingatka asal palan pengangkat Masterpiece.

“Tiket konsert deka dichelak lalu dijual urung minggu tu berengkah ari rega RM30, RM50, RM80 enggau RM100,” ku iya.

Kelimpah ari nya, dia iya ngarapka Masterpiece tetap mansang ngerembai enggau maju ba industri muzik di menua tu sereta ba menua luar ngambika bansa bukai nemu muzik di menua tu ngembuan penyelai.

“Pia mega, aku ngarapka mayuh agi ejensi bukai baikka ari menua tu empu tauka menua luar sanggup melanja konsert besai artis-artis Dayak.

“Bagi bala nembiak baru ti deka masuk dalam industri muzik Dayak kelebih agi Iban, anang rawan ngambi penau sereta pengelandik belagu, nebah perengka muzik enggau nengkebang lagu.

“Ngagai sida ti landik begagaka video klip anang malu sereta rawan laban menua kitai udah maju lalu anang ngelepas peluang teknologi kemaya hari,” ku iya.

Nangkan nya, iya enggau temegah madahka raban sida tetap begempung kenyau taun 2005 laban ti beserakup enggau pangan diri taja dituntung penguji.

“Kami seraban tetap tan teguh begulai nyentuk kediatu laban tetap begempung sereta bekerjasama dalam mutarka nama-nama peanggul.

“Kenyau taun 2005 kami numbuhka Masterpiece datai ke diatu, kami endang tetap nanggam kaul ti rat enggau pangan diri,” ku iya.

Masterpiece ngembuan tujuh iku raban iya nya Depha (Penulis lagu enggau Vokalis), Will (Lead Guitar), Kent (Lead Guitar), Marcus (Bassist), Harrold (Drum), Emek (Keyboardist) enggau Rosli (Keyboardist).

Konsert Masterpiece 1Dekad Merindang ke Bintang (MKB) tu ila deka diatur kena 7 Disember ba Stadium Tertutup Sibu berengkah 8.30 malam.

Album MKB suba dirakam ba studio Masterpiece empu ianya ‘Masterjam Studio’ ba Sibu lalu sekeda track lagu dirakam ba Studio Fish Farm Record, Kuching.

Ketegal sambut ti manah ari peminat album MKB dichelak dua kali dalam CD, VCD enggau DVD iya nya keterubah ari Masterpiece empu sereta kedua Masterpiece begulai enggau Panggau Buluh Pengerindu, studio Embat Lala.

Suara Sarawak