MIRI: Kenyau ditumbuh kena 7 April 2021 Sarawak Coastguard udah mujur bejalaika 27 bengkah operasyen nginau di kandang tasik menua tu.
Direktor Unit Pengelikun enggau Penerit Adat Sarawak (UKPS) Datuk Dr. Chai Khin Chung madahka Sarawak Coastguard mega ngaul diri dalam sepuluh ‘Operasi Carilamat’ enggau dua bengkah latih ‘carilamat’ begulai enggau ejensi pengelikun bukai.
“Kaul tu meri pemaik ngagai bala pemesai enggau raban Sarawak Coastguard laban operasyen enggau latih nya ulih ngemansutka pengereja pengawa ti regas, seruran bejaga ngagai ubah rampa menua, sikar, meri perati enggau produktif lebuh bejalaika pengawa.
“Pemesai enggau raban Sarawak Coastguard mega dilatih nengah penemu lebuh sida ngambi kus kompetensyin baka Seaman Basic Training, Engineer Officer Less Than 750 Kilowatt on Domestic Voyage, Mate of Less than 500 Gross Tonnage on Domestic Voyage, Kus Pemun Meteorologi, Kus Pemun Pansik Pengawa Salah enggau Kus Pemun Pengelikun enggau Psikologi ba institusyen perintah enggau peribit,” ku iya.
Khin Chung bejaku munyi nya rambau pengawa Ngelancharka Kapal Penginau Laju Kelas Pulau Sarawak Coastguard enggau Bejadi Markas UKPS Miri ditu, kemari.
Iya madah baru, kenyau udah ditumbuhka mega, Sarawak Coastguard udah mujur ngena enam buah Interceptor kena 7 April 2021.
“Sehari tu (kemari) Sarawak Coastguard deka ngena enam buah Kapal Penginau Laju Kelas Pulau iya nya SC Sari 2501, SC Satang 2502, SC Burung 2503, SC Sampadi 2504, SC Tukong Ara 2505 enggau SC Talang-Talang 2506.
“Aset tu diambi nengah tinda tebuka lalu digaga sebuah serikat di Kuala Baram,” ku iya.
Iya nangkan nya meri terima kasih ngagai semua ejensi bekaul ti udah ngemujurka pengawa nya baka Opis Kereja Raya, Tim Polis Marin, Opis Tasik, Kaunsil Penyangkai Kapal Kuching enggau Kaunsil Sungai Sarawak.
