KUCHING: Sarawak sehari tu ngerikodka 2,723 kes positif baru Covid-19 lalu ngujungka penyampau semu kes positif di nengeri tu nambah ngagai 127,151 kes.
Komiti Penyangga Penusah Nengeri (JPBN) nengah penerang media iya madahka Pelilih Menua Kuching terus ngerikodka kes positif pemadu tinggi iya nya 1,231 kes ditangkanka Sibu (323), Bau (125), Betong (110), Mukah (104), Bintulu (100) enggau ke bukai.
Penerang tu mega madahka, Sarawak ngerikodka dua kes pemati baru ngaul dua iku lelaki di Serian enggau Bau.
Seduai ti midang tu beumur 75 enggau 100 taun sereta ditukuka positif Covid-19 kena 20 enggau 30 Ogos tu tadi.
Nangkan ke nya, bisi tiga kluster baru dirikodka mega iya nya Kluster Jalan Tunku Abdul Rahman Sibu, Kluster Pasaraya Batu Kawa Kuching enggau Kluster Kampung Sikog Kuching.
Penerang tu madahka tiga kluster ditukuka punas iya nya Kluster Jalan Tatau-Selangau, Tatau, Kluster Kampung Jawa, Kuching enggau Kluster Crown Mas, Kuching.
Pia mega, Pelilih Menua Marudi bebali ari status kuning ngagai mirah kemari pengudah ngerikodka 41 kes berampit dalam timpuh 14 hari ke udah lalu.
Mensia mayuh dipinta terus bejaga sereta bejimat dikena nyeliahka pengerekai penyakit Covid-19. Nyema nadai pekara berat, anang mindah ari rumah.
