BELAGA: Pengeransing nyungkak sistem karan di selampur Sarawak majak ditegap nengah 275kV Bakun–Murum Transmission Line Project (Circuits 3 and 4), ti nentu bekal karan lebih agi manah nyengkaum ba sitak tengah negeri tu.
Pengawa ngelai pemujur projek nya dirami ngena chara lama ‘Pela Daleh’ ti nyadika basa ngagai adat enggau daya idup raban Orang Ulu.
Pengawa ke diatur Opis Pelilih Belaga enggau kerejasama Sarawak Energy nya dipenyadi Sapit Menteri Utiliti enggau Telekomunikasyen (Telekomunikasyen), Datuk Liwan Lagang lalu bela digulu Kaban Kunsil Nengeri (ADUN) Murum, Kennedy Chukpai Ugon.
Bela datai maya nya Tuai Pegawai Eksekutif SEB Power, Ir. Bunyak Lunyong, Pegawai Pelilih Belaga, Bidah Lujah, pengari agensi perintah sereta tuai raban bansa menua nya.
Ir. Bunyak ba jaku iya madah, projek nya deka ngenegapka agi sistem grid karan di Sarawak lalu nentuka karan semampai konsisten ungkup guna domestik enggau industri.
“Ukai semina bekaul pemujur projek, pengawa ke diatur sehari tu bela mandangka Sarawak Energy bebasaka adat enggau daya idup peranak menua tu,” ku iya ba pengawa nya, Hari Tiga tu tadi.
Kelimpah ari nya,’Pela Daleh’ bela deka diatur baru ba endur bukai baka ba Uma Badeng, Uma Nyaving, Uma Apan, Uma Sambop Long Semutut, Uma Sambop Batu Pilau enggau Rumah Kejaman Lasah.
Projek urung 21.2 kilometer nya nyambung karan ari Tekat Ai Bakun enggau Murum Junction.
Naka Mac 2026, projek ke digaga kenyau ari Disember 2025 nya diatu udah digaga 8.64 peratus. — EDISI UKAS
