KUCHING: Sepenyampau 278 atlit udah beperesa pengerai komprehensif di baruh Program Atlit Bepengerai (HAP) serimbai Lumba Olimpik Khas Sarawak Renggat Ketujuh 2025.
Menteri Pemansang Indu, Nembiak Mit enggau Pengelantang Komuniti Datuk Seri Fatimah Abdullah madah ke program nya dipejalai ungkup tuju deka negapka pengerai orang ti begunaka kereban khas, kelebih agi sida ti bisi penanggul runding enggau pemansang (IDD).
“Nengah HAP tu, kitai mujur bejalaika pengawa meresa pengerai ngagai 278 ari 358 atlit tauka 77.6 peratus ngaul lima bagi menua iya nya Sibu, Bintulu, Miri, Kuching enggau Samarahan.
“Ari penyampau nya, 92 iku ari 96 iku atlit Sibu mujur beperesa pengerai, ditangkan Bintulu (40/41), Kuching (78/130), Miri (27/30) enggau Samarahan (41/72),” ku iya.
Fatimah bejaku munyi nya rambau pengerami penutup Lumba Olimpik Khas Sarawak Renggat Ketujuh 2025 ba Palan Aum Hikmah Exchange (HEEC), malam tadi.
