KUCHING: Semina 28 peratus nembiak di Sarawak ti ngambi pelajar sains tulin kandang diatu lalu tu ngasuh menua kitai kedua pemadu mimit di Malaysia.

Presiden Serakup STEM Nasional (NSA) Profesor Emeritus Datuk Noraini Idris madah, nya alai sida sedia bekerejasam enggau Opis Menteri Pelajar, Inovasyen enggau Pemansang Bakat nyaup marit nembiak Sarawak kelebih agi rinduka subjek biologi, fizik enggau kimia nya.

“Diatu Sarawak udah meri perati lebih ngagai pekara kuasa ke ulih dikena baru, hydrogen enggau biodiversity lalu dikearap mayuh agi nembiak Sarawak deka ngaga inovasyen sida sereta nyerungkai pasal pekara fizik, kimia sereta matematik tambahan.

“Kebuah pia laban enti kitai deka nguing ngagai Artificial Intelligent (AI), sida tu mesti pintar ba matematik tambahan, fizik, kimia enggau biologi,” ku iya.

Noraini bejaku munyi nya lebuh dirandau pengudah bejadika Program Mini Teater STEM Sarawak di SMK Tun Abdul Razak, ditu tadi, ti dipenyadika Menteri Pelajar, Inovasyen enggau Pemansang Bakat, Datuk Roland Sagah Wee Inn.

berita penuh ba Ruai 2 pagila