3,022 buah rumah di Simunjan nerima bantu sehari tu

SIMUNJAN: Urung 3,022 buah rumah di Simunjan deka nerima bantu barang pemakai berindik ari Atur Tagang Pejalai (PKP) tu sehari tu.

Kaban Kunsil Nengeri (Adun) Simunjan, Awla Dris madah bantu nya mungkur mensia mayuh ke diau ba genturung pendiau Zon Simunjan Proper enggau Zon Rangawan.

Kemari, bisi 997 buah rumah di Zon Temiang enggau Zon Sungai Apin di sitak Simunjan berengkah nerima bantu.

Pia mega, dikena nentuka pengawa nyadung barang pemakai tu lanchar, Awla empu bela datai nyereta pengawa nya taja gaya hari ujan.

Kenu ku Awla, bisi 19 buah genturung pendiau nerima bantu barang pemakao nya.

“Entara genturung pendiau tu iya nya Kampung Temiang, Kampung Sungai Raya, Kampung Emplas, Kampung Simunjan Jaya, Kampung Pentek, Kampung Batu Mumong, Kampung Gunung Ngeli, Kampung Mengeli, Kampung Kampung Sungai Jong, Kampung Sungai Lingkau, Kampung Melanjok, Kampung Sual enggau Kampung Sekendu bela ba Zon Temiang.

“Udah nya ungkup Zon Sungai Apin, genturung pendiau ke nerima bantu iya nya Kampung Sungai Apin, Kampung Pantong Iban, Kampung Pantong Melayu, Kampung Tanjung Harapan, Kampung Tanjung Pisang enggau Kampung Selangking,” ku iya kemari.

Suara Sarawak