LUNDU: Ba timpuh 2021 nyentuk suku keterubah 2023, Perintah Sarawak udah mantu lebih ari 36,000 orang dagang nengah bantu belanja, pemansang kapasiti enggau program ngelakuka produk.
Sapit Premier Sarawak ti mega Menteri Dagang Antarabansa enggau Pengawa Beranakka Puku, Datuk Amar Awang Tengah Ali Hasan madah, kelimpah ari bantu Perintah Besai, Perintah Sarawak mega bisi nyendiaka agih tambah nengah RM6.7 bilion di baruh Pakej Bantu Khas Sarawakku Sayang (BKSS) 1.0 nyentuk BKSS 9.0.
“Semua nya dikena mantu rayat enggau raban orang dagang mit enggau jelan pemesai (PKS) ti nerima empas ari sukut belanja enggau ukai belanja.
“Perintah Sarawak nengah opis menteri aku mega nampung skim jali muntang ba tikas pemadu baruh iya nya empat peratus nengah Skim Kredit Mikro Sarawak (SKMS) enggau Skim Jali Industri Dagang Mit enggau Jelan Pemesai (SPIKS),” ku iya.
Teks jaku iya dibacha Sapit Menteri Dagang Antarabansa enggau Pengawa Beranakka Puku, Datuk Dr. Malcom Mussen Lamoh rambau bejadika Program Regista Bisnes ba Balai Mensia Mayuh Lundu, ditu tadi.
Ku iya, naka diatu bantu penyampau RM101.6 juta udah diberi ngagai orang dagang
sereta meri pemaik ngagai lebih 2,500 iku PKS.
