KOTA SAMARAHAN: Aktiviti komoditi dagang temuai, agro dagang temuai enggau roadshow pelajar Koperasyen Kluster Koko Sarawak Berhad (3KQ) disadang nyadi produk baru dikena ngangkatka dagang temuai industri koko ba Sarawak.
Sapit Menteri Besai, Datuk Seri Fadillah Yusof madah, aktiviti koko bepelasar ke konsep ‘ladang ke mija’ ungkup produk komoditi dagang temuai enggau agro dagang temuai ukai semina ulih nambahka penatai pemisi koperasyen tang nyukung pemeruan industri koko menua.
“Pengusung ukai semina ulih muai penusut runding tang ulih belajar senentang rentayan koko berengkah ari pengawa nanam nyentuk nyadi produk chokelit ti udah tembu.
“Ngarap pengawa nambah aktiviti baru tu ulih narak penyedar mensia mayuh enggai bala temuai ti datai ngagai industri koko ba Sarawak,” ku iya.
Fadillah mansutka jaku nya rambau bejadi Program Hari Berandau enggau Kluster Koko 2023 ba Palan Pemansik enggau Pemansang Koko ditu, kemari.
Aktiviti nya dipejalai nengah kerejasama Opis Residen Samarahan, Kaunsil Dagang Temuai Sarawak (STB), Opis Menteri Dagang Temuai Seri enggau Main Asal (MOTAC) sereta ejensi dagang temuai Sarawak kelimpah Komiti Besai Koperasyen Malaysia (SKM).
Ku iya, pemesai ladang koko pemadu baru iya nya 5,985 hektar lalu 1,473 hektar tauka 24.6 peratus ari penyampau nya ditanam ba Sarawak.
Naka diatu, ku iya, bisi 1,290 pekebun koko dirikod ba Sarawak.
