SRI AMAN: Penusah bah ti nyadi di sitak Pantu ngujungka Jematan Batang Seterap enda ulih ditengah lalu peranak dia tepekul.

Pekara nya ngujungka lebih 40 rumah panjai di seberai jematan nya tepekul sereta putus kaul enggau peranak luar. Kaban Kunsil Nengeri (ADUN) Balai Ringin, Datuk Snowdan Lawan madah, pekara nya meri pemar ngagai peranak dia ngulih akses fasiliti pemun enggau bantu ngenyit.

“Taja pia, Opis Pengintu Pengelantang Komuniti (JKM), Opis Pelilih Pantu sereta Opis Bomba enggau Penyah Penusah Malaysia (JBPM) udah nyikap diri meri bantu.

“Tu nyengkaum bantu pemakai enggau perengka guna bukai ti diguna peranak dia,” ku iya.

Snowdan ti mega Sapit Menteri Dagang Temuai, Industri Kreatif enggau Seni Pemerindang mansutka jaku nya rambau matau gaya penusah bah di Jematan Batang Seterap ditu, kemari.

Bela nyempulang iya, Pegawai Opis Pelilih Pantu, Raca Mulong, staf Opis Pelilih Pantu, Stanley Randy, Patat Governor, Franklin Regu enggau Rom Desmond sereta Kapitan Lee Khin Onn.