KUALA LUMPUR: Urung 42,000 nembiak Sarawak ke diatu belajar ba Palan Pelajar Tinggi (IPT) di selampur menua deka nerima Inisiatif Bantu Belanja Khas (BKK) Nembiak Sarawak baka disemaya Perintah Sarawak sebedau tu.
Premier Sarawak, Datuk Patinggi Tan Sri Abang Johari Tun Openg madah, Perintah Sarawak dikemudi Gempung Parti Sarawak (GPS) ngamatka semaya ti disebut ba Program Lan Berambeh Anak Sarawak (LBAS) suba.
Ku iya, inisiatif BKK sepenyampau RM1,200 diberi berenggat nengah aplikasyen S PAY Global ti bekenaka belanja manggai RM50.4 juta.
“Sehari tu, aku ngamatka semaya aku. Anak Sarawak chukup betuah, ukai semina ketegal bulih bantu belanja aja, tang sida benasip laban bisi Perintah Sarawak ke chukup siru.
“Kebuah pia, enda semua ulih ngamatka semaya baka tu, tang kitai bisi Perintah Sarawak ti siru, ti jauh tinjau ba pemansang Sarawak, baka deka ngurang tikas pengidup seranta enggau nyungkak ekonomi Sarawak datai ba tikas global,” ku iya.
Abang Johari madah munyi nya ba Program Ngelanchar Bantu Belanja Khas Nembiak Sarawak ba Intitusyen Pelajar Tinggi di Malaysia ba siti hotel tebilang ditu, tadi.
Iya mega nyemetak madah ke pengeransing Perintah Sarawak ba pengawa ngenegapka pekara pelajar lalu chakah ngemansangka ekonomi nengeri nengah macham inisiatif strategik.
Ku iya, bantu tu diberi enda ngira asal penatai nembiak, sebagi ari sukung strategik nempa rebak baru Sarawak ngembuan intelek, ulih besemekih enggau bisi pengulih nyerungkai peluang ti ukai semina ba nengeri aja tang mega ba tikas antarabansa.
“Kitai benung nyikap anak Sarawak nyadi pengereja profesional tikas global.
“Struktur ekonomi dunya udah berubah. Nya alai, kitai patut nyikap diri bekereja enggau besemekih ba luar Sarawak,” ku iya nyemetak.
Sama datai, Sapit Menteri Besai, Datuk Sri Fadillah Yusof, Menteri Pelajar, Inovasyen enggau Pemansang Penau Sarawak, Datuk Sri Roland Sagah Wee Inn, Menteri Kereja Raya, Datuk Sri Alexander Nanta Linggi enggau pemesai ke bukai.
Dulu ari nya, Sagah madah ke tetiap nembiak ke patut bulih bantu deka nerima RM600 siti semester, reti nya, sida deka nerima dua kali setaun sekumbang belajar.
Ku iya, inisiatif nya ukai semina nyaup belanja sida, tang mega nyadi ke peransang ngagai anak Sarawak ransing agi belajar lalu enda kelalu berundingka tating belanja.
“Dikena nentuka nadai nembiak tinggal nerima bantu tu, renggat kedua deka berengkah dibuka September tu.
“Tu meri peluang ngagai nembiak ke baru rejister ba IPT tauka sida ke empai ulih ngadu peminta ba renggat keterubah sebedau tu,” terang Sagah.
