KUCHING: Bisi 4,755 kes bekaul enggau penyarut tanah adat udah direjister ba Kort Bumiputera Sarawak naka 1 Mei 2026. Sapit Menteri ba Opis Premier Sarawak (Undang-undang enggau Adat Bumiputera), Datuk Jefferson Jamit Unyat madah, kes nya deka dipechara ba tiga renggat Kort Bumiputera Sarawak iya nya Kort Bumiputera Pelilih Menua, Kort Bumiputera Residen enggau Kort Apil Bumiputera Sarawak.
“Ari penyampau nya, 1,316 kes agi diputar ba renggat Kort Bumiputera Pelilih Menua, 187 kes ba renggat Kort Bumiputera Residen enggau 92 kes ba renggat Kort Apil Bumiputera,” ku iya.
Jefferson bejaku munyi nya lebuh nyaut tanya Kaban Kunsil Nengeri (ADUN) Pelagus, Wilson Nyabong Ijang bekaul status Pelin Besai Transformasyen Kort Bumiputera Sarawak rambau Aum Keterubah Penggal Kelima Kunsil Nengeri (DUN) Sarawak Ke-19, ditu, kemari.
Ku iya, pansik ti dipejalaika ba taun 2020 dikena nusun baru sereta ngangkatka Kort Bumiputera Sarawak udah tembu ba bulan Februari 2023. Iya madah, ripot kepenudi pansik nya dibantai ngagai Kaunsil Eksekutif Nengeri (MMKN) ba bulan Julai 2023, ke alai MMKN udah ngemendar asil pansik Pelin Besai Transformasyen Kort Bumiputera Sarawak nya.
“Bepelasarka pelin besai transformasyen tu, Kort Bumiputera Sarawak deka ngaga ubah ba Native Courts Ordinance, 1992.
“Ngambi pengawa nusun baru nya ulih dipejalai, ordinan diguna diatu deka dikinsil sereta ditukar enggau Ordinan Kort Bumiputera ti baru nengah Rang Undang-Undang Kort Bumiputera ti benung dilangkar sereta dibantai ba DUN Sarawak.
“Pengawa nusun baru nengah rang undangundang baru nya deka ngaul ubah ba struktur atur menua enggau bidang kuasa kort,” ku iya.
Jefferson madah, Kort Bumiputera Sarawak udah bejalaika bemacham chara strategik dikena ngerumban pengawa mutar kes ti bekaul, nyengkaum nengah pengawa bejalaika Program Nambah Kapasiti (CBP) ngagai raban pegawai perintah, kerani enggau peon court.
Ku iya, naka 30 April 2026, program nya udah dipejalai di Sri Aman enggau Sibu mungkur penyereta ari Bagi Menua Kapit penyampau 40 iku, kelimpah ari randau di Selangau, Sibu enggau Limbang ngaul 70 penyereta iya nya kerani, tuai komuniti enggau tuai raban bansa.
