600 buah tiang komunikasyen digaga dalam timpuh dua taun

SPAOH: Perintah nengeri deka nirika 600 buah tiang telekomunikasyen ba selampur Sarawak dalam timpuh duataun tu.

Kepala Menteri Datuk Patinggi Abang Johari Tun Openg madah, tu dikena nentuka selampur Bumi Kenyalang ulih disambung enggau arus telekomunikasyen.

“Taun tu kitai ngaga 300 tiang telekomunikasyen lalu ‘insha-Allah’ 300 agi ba taun baru lalu nya deka nyendiaka bungkur arus penyambung ngagai selampur menua di Sarawak,” ku iya.

Iya madah munyi nya rambau bejadika Pengawa Nasih Tanah Tiang Telekomunikasyen di Luban Ulu, kemari.

Nya alai, sehari tu pengawa ninting ari begunaka teknologi baru lalu besambungka kaul entara mayuh endur.

“Nyadi nama ke nyadi udah tu, kitai deka besambungka siti endur ngagai edur bukai enti tiang komunkasyen tu udah tembu ila.

“Udah nya, ayan teknologi baru iya nya chip mit dikena manchar arus ke kuat… teknologi pan betambah.

“Aku andal, taja iya mar tang tu chara kitai ngubah ekonomi lalu ba aku nadai chara bukai dikena nyungkak pengawa e-dagang,” ku iya.

Ungkup selampur menua Betong, taun tu deka digaga 39 buah tiang telekomunikasi lalu nya jemah deka numbuhka komuniti digital.

Nangkan nya, Menijar Besai Sarawak Multimedia Authority (SMA) Dr. Zaidi Razak madah, Bagi Menua Betong lebih agi bulih bungkur arus penyambung ke lebih manah udah tu.

Tiang telekomunikasi di Luban Ulu ulih meri bungkur arus penyambung nyentuk lima kilometer persegi.