62 peratus peranak Kapit udah divaksin

KUCHING: Naka 17 Julai tu tadi, bisi 102,571 dos vaksin Covid-19 udah diberi ngagai peranak Bagi Menua Kapit, ku Sapit Kepala Menteri Tan Sri Dr James Jemut Masing.

Pekara tu dipansutka Masing nengah sebengkah penerang media kemari ke alai 58,531 dos keterubah ti diberi nya mungkur 62.3 peratus rayat di Kapit.

Kelimpah ari nya, ku iya 42,220 dos tauka 47.1 peratus peranak di Bagi Menua Kapit udah nembuka dua dos vaksin.

Terang Menteri Infrastruktur enggau Pemansang Penyangkai Kapal tu, nitihka Opis Perangkaan Malaysia (DOSM- 2020), 93,000 ari semua 134,800 peranak di Kapit beumur 18 taun ke atas ulih nerima vaksin Covid-19.

“Kenyau Program Outreach Palan Meri Vaksin (PPV) Mindah kena 14 June nyentuk 17 Julai diatur, puku rata dos vaksin diberi sehari bisi 2,762 dos.

“Nyengkaum dos ti diberi sebedau program tu (8,662 dos), penyampau semua dos ti diberi bisi 93,909 dos,” ku iya.

Masing ti mega Adun Baleh madahka, puku rata 2,762 dos ti diberi nya dalam timpuh 34 hari.

“Tu nunjukka 58,531 ari penyampau 93,900 peranak udah divaksin pengabis nadai siti dos iya nya mai reti 62.25 peratus penyampau rayat di Kapit,” ku iya.

Suara Sarawak