KUCHING: Premier Sarawak, Datuk Patinggi Tan Sri Abang Johari Tun Openg madah ke iya nadai penanggul nyema Pengawa Bepilih Besai Nengeri (PRN) Sarawak diatur ngena 82 penuduk Kunsil Nengeri (DUN) enti pengawa nambah 17 penuduk baru ngagai 99 penuduk nya enda ulih dipejurai nitih timpuh.
Iya ti mega Chairman Gempung Parti Sarawak (GPS) madah, pekara nya nadai ngawa laban bepanggai ba atur ti dipejalai enggau timpuh ti bisi sebedau DUN direrak.
“Enti 82 (penuduk), 82 ga.
Enti 99 (penuduk), 99 ga. Nadai nanggul laban kitai enda tentu ibuh sekali ke ngena 99 penuduk nya,” ku iya lebuh aum pemberita pengudah bejadi Health Management International (HMI) Medical di The NorthBank ditu, kemari.
Abang Johari nyaut munyi nya lebuh ditanya bekaul pemansang penyampau penuduk ti deka diperebut ba PRN Sarawak ti deka datai.
Ku Abang Johari, parti iya mega setuju enggau atur ti udah bisi kenyau ari timpuh ngemujur pengawa nambah penuduk baru nya.
“Timpuh nya amat pandak, pekara ti ulih dikereja kitai semina bejalaika utai ti bisi diatu.
“Pekara pemadu beguna iya nya orang ti ngundi,” ku iya. Ba bulan Julai taun siti nyin kemari, DUN Sarawak udah ngemendar pengawa nambah 17 penuduk baru ti ngujungka penyampau semua penuduk nya ari 82 ngagai 99 penuduk.
Taja pia, pengawa nambah penuduk baru tu engka mar dikena ba pengawa bepilih Sarawak ti deka datai, ti dipelaba diatur ujung taun tu tauka pun taun 2027 ketegal atur pemendar ari Parlimen ti apin dikenuku.
Kemari, Menteri Pemansang Orang Indu, Ruang Bilik enggau Komuniti Datuk Seri Nancy Shukri madah ke iya enggau Menteri Kereja Raya ti mega Sekretari Besai GPS, Datuk Seri Alexander Nanta Linggi udah mantaika isu nya ba aum kabinet.
Berindik ari nya, Tuai Pemadah Perintah MADANI, Datuk Seri Fahmi Fadzil madah ke Menteri Besai, Datuk Seri Anwar Ibrahim udah mantaika komitmen iya deka bejalaika perambu ngaga baru garis entara menua dikena nambah penuduk DUN Sarawak.
Ku iya, Menteri Besai mega udah minta Komiti Pengawa Bepilih (SPR) meri ripotpemadu baru bekaul enggau pekara nya.
