KUCHING: Tim Immune Belt Enforcement Team (IBET) udah meri tuchuk vaksin ngagai urung 89 peratus ukui ba adan menua ti dijaga sida nyadi sebengkah pengawa nagang pengerekai penyakit rabies di nengeri tu.
Menteri Industri Pemakai, Komoditi Enggau Pemansang Wilayah Sarawak Datuk Seri Dr. Stephen Rundi Utom madahka naka diatu tim IBET udah mujur bejalaika pengawa meri vaksin ba kandang menua ari Lundu nyentuk ke Lawas mungkur 1,002 kilometer.
“Pengawa sida nya chukup manah iya nya 89 peratus ari penyampau ukui ti dikelala ba palan nya udah dituchuk vaksin, iya nya, 36,900 ari 40,000 iku ukui.
“Nya alai, udah bulan June 2023, nadai agi kes rabies diripotka ba Sarawak,” ku iya.
Rundi bejaku munyi nya rambau aum pemberita pengudah bejadi Gempuru Rabies di Borneo (RIB) ba sebuah hotel ditu tadi.
Ku iya, IBET diberi tanggung pengawa meri tuchuk vaksin ba sepemanjai adan menua Sarawak kelebih agi dalam nagang ukui lelang tama ke menua tu.
