KOTA PADAWAN: Sepenyampau 93 nembiak ari mayuh Palan Pelajar Tinggi (IPT) perintah, peribit enggau palan vokasional nerima pemaik ari Program Insentif Nembiak 2025 penyampau RM80,300.
Sapit Menteri Pengangkut Sarawak (Langit enggau Darat), Datuk Dr. Jerip Susil madah, program nya ukai semina bantu belanja tang mega siti pengawa meranak puku timpuh panjai ungkup pemansang rebak biak dudi hari.
Iya madah, bantu tu ngaul nembiak ba mayuh renggat belajar nyengkaum setipikit, diploma, degree enggau master.
“Taja penyampau bantu tu mit tang enti dikena chara pintar sereta manah, tu ulih nyaup ngelempung tating ruang bilik enggau meransang semangat nembiak terus nyapai pemujur,” ku iya ba pengawa nyua insentif nya ba Balai Gerempung Klan Jong, ensanus.
Jerip mega meri terima kasih ngagai raban Gerempung Klan Jong laban udah nanggam kerejasama ngemujur pengawa nya lalu nyua bantu ngagai nembiak
. “Aku mereti ke pemar besai ditapi apai indai melanja pelajar anak sida.
“Nya kebuah, bantu tu deka ditampung belama nentuka nadai nembiak kena tinggal ketegal suntuk belanja,” terang iya.
Kaban Kunsil Nengeri (ADUN) Mambong nya nyemetak madah, pelajar nya kunchi ngubah tikas idup komuniti menua pesisir.
“Kitai deka anak ngembuan penemu enggau pengelandik ngambi ulih bediri kediri sereta nyungkak pemansang sitak Mambong enggau nengeri Sarawak,” terang iya.
Iya mega ngingatka penerima semampai ngenang jasa apai indai sereta tuai komuniti ti semampai bebendar nentuka peluang pelajar terus disedia ngagai rebak biak. — EDISI UKAS
