KUCHING: Kepala Menteri Datuk Patinggi Tan Sri Abang Johari Tun Openg ngenukuka diri deka bediri ba Dun Gedong dalam Pengawa Bepilih Besai Nengeri (PRN-12) tu ila.

Chairman GPS nya semina nyebut ‘ya, amai’ lebuh ditanya media nganti penyandang Dun Gedong diatu iya nya Datuk Mohd Naroden Majais.

“Iya, amai,” ku saut iya pandak ba aum media pengudah Nyuaka Surat Nyiri Chalun GPS di Indu Opis Parti Pesaka Bumiputera Bersatu (PBB) ditu, lemai tadi.

Sebedau tu rambau Pengawa Nasih Tanah Lubok Teranggas di Gedong Naroden madahka iya ngelaluka diri deka meri awak ngagai Abang Johari bediri ba Dun Gedong.

Ku iya, nyema Abang Johari bediri di Gedong kandang menua nya ila napi pemansang enggau pangka ekonomi ti lebih manah nyentuk ngagai sitak Simunjan, Samarahan enggau Sebuyau.

Berita Abang Johari disadang deka bediri di Dun Gedong berengkah ayan kenyau berita pasal PRN-12 di Sarawak berengkah tu tadi.

Taja pia, Abang Johari majak enda bebunyi lebuh ditanya raban media sebedau tu seraya madahka pekara nya agi diperundingka iya.

Berebak enggau nya, penuduk Abang Johari ti mega penyandang Dun Satok deka diganti Sapit Tuai PBB Pampang Satok Datuk Ibrahim Baki, siku agi mua baru GPS ti deka bediri dalam PRN-12 ti deka datai.