BALI: Premier Sarawak, Datuk Patinggi Tan Sri Abang Johari Tun Openg mujur ngenataika diri ba Bali serimbai pengawa ngulu Gempuru Besai Serakup Gerempung Injiniring ASEAN (CAFEO) Ke-41.
Iya enggau bala diligit ari Sarawak datai ba hotel endur diau urung pukul 1.40 ngalih hari tadi.
Sapit Menteri Infrastruktur enggau Pemansang Penyangkai Kapal Sarawak, Datuk Ir Aidel Lariwoo, Sekretari Wang Sarawak, Datuk Sri Dr. Wan Lizozman Wan Omar sereta bala pegawai opis perintah ke bukai sama nyempulang Abang Johari.
Pengawa bejadika CAFEO Ke-41 nya deka diatur ba Palan Konvensyen Nusa Dua, Bali, pagila.
Ba program nya, Abang Johari disadang nerima basa ‘Honorary Fellow’.
Basa nya semina diberi ngagai sida ke nyulut ke udah mayuh meri saup ngagai profesion injiniring, pemansang institusyen enggau semua pengawa menua ti besai reti lalu deka megai gelar ‘Dist. Hon. FAFEO’.
