KUCHING: Polis ngenukuka siku nembiak lelaki beumur 11 taun diripot lenyau ari rumah iya ba genturung pendiau Pertahanan Awam Mindef kena malam Hari Minggu tu tadi udah ditemu selamat.

Ketuai Polis Pelilih Padawan, Superintenden Aidil Bolhassan madah, Abdul Azim Ahmad Dzulkarnain, 11 ditemu mensia mayuh ba sebuah pak makai di Jolibee di Batu 3 Sungai Maong urung pukul 11.45 malam kemari.

“Asil pansik tetemuka iya ba pak makai Jolibee lalu diberi siku pengereja pak Orang Nyelai Pendiau (OKU) makai.

“Muhammad Firdaus ti meda nembiak dikumbai lenyau nengah jaku gerah sistem ‘Nur Alert’ PDRM ba laman Facebook berumban ngeripot ngagai piak polis.

“Nembiak mit ti ditemu benung makai udah dibai ngagai Opis Polis Kota Sentosa ngambi atur patut dipejalai,” ku iya ba penerang tadi.

Kenu ku iya, pun penusah nembiak mit nya ngelarika diri ari rumah ketegal nangika diri dipalu indai iya laban ulah kelalu manchal.

“Nembiak mit tu dituku likun sepanjai timpuh ripot iya lenyau dataika ditemu kemari,” ku iya.