ACD Kedua dipejalai ba Kpg Tabuan Lot

KUCHING: Operasyen Nyidi Kes Aktif (ACD) kedua ba menua tu udah berengkah dipejalai sehari tu ba Kampung Tabuan Lot.

Chairman Komiti Penyangga Penusah Ngenyit Nengeri (JPBN), Datuk Amar Douglas Uggah madah, ACD tu deka dipejalai mungkur 423 rumah ba sitak nya enggau ngaul urung 2,100 iku.

“ACD dipejalai ditu laban siku peranak ari genturung pendiau tu udah parai ketegal dirampit igi penyakit Covid-19, apin lama ke udah.

“Bisi siti kes Orang Dipelaba Kena Rampit (PUI) mega ditemu ditu lalu kami bedau nyidi pesakit PUI ba Sepital Besai Sarawak (SGH) enggau kluster bukai,” ku Uggah.

Uggah mansutka jaku nya ngagai pemberita pengudah ngabas Palan Beperesa Covid-19 ba Dewan Datuk Seri Dr Wan Junaidi pagi tadi.

“Kami irau, engka bisi sekeda kes ti bedau ulih ditemu ditu. Nya kebuah kami bejalaika ACD ditu lalu raban tu deka meresa ari rumah ke rumah.

“Sida mega deka diasuh beperesa pengerai lalu diambi chunto lendir ari rekung ba balai nya,” terang Uggah nyemetak.