INDUN SILONG
suarasarawak.sv@gmail.com
KUCHING: Gerempung Gerija Sarawak (ACS) deka ngatur sembiang Hari Krismas kena malam Hari Empat tu (19 Disember 2024) ba Palan Sembiang Kristian Ecumenical ACS di Jalai Stampin pukul 7.30 malam.
Sekretari ACS, Ambrose Linang madah, semua gerija dalam gerempung nya deka ngulu program tu.
Ku iya, sida nya baka Gerija Roman Katolik, Gerija Anglikan, Gerija Methodist SCAC, Gerija Methodist SIAC, Gerija Seventh-Day Adventist, Gerija Sidang Injil Borneo (SIB), Palan Pengintu Nembiak Salvation Army, Gerija Baptisa Sarawak enggau Sarawak Blessed Church.
“Sembiang sekali tu deka diatur Gerija Methodist SCAC ti ngena rambai jaku ‘Pengasih ti Ngubah’.
“Kami mai ati ransing deka madah ngagai kitai semua Tuhan kasih ke dunya.
“Nya alai nyentuk diatu Iya meri Anak tunggal Iya, Jesus Kristus ke dunya awakka barang sapa pechaya ke Iya enda deka tusah tang bulih pengidup ti meruan,” ku iya.
Ambrose bejaku munyi nya rambau aum pemberita Sembiang Hari Krismas ACS Malam Hari Empat ba Opis ACS di Jalai Stampin ditu, tadi.
Ku iya, sekeda pekara beguna ti dibantaika rambau nya ila meri perati ngagai transformasyen ti dibai dalam pengasih Tuhan.
