Adan menua semampai dijaga

TEBEDU: Pengelikun ba garis entara menua seruran dijaga terit nentuka nadai sebarang piak ulih lepas kelebih agi perintah kededua menua diatu nagang pengerekai igi penyakit Covid-19.

Raban soldadu ke dianjung gawa nyaga garis entara menua mega semampai bejaga enggau nyikap diri ngena kereban nyaga diri (PPE) sekumbang kes positif Covid-19 ditemu nyadi.

Nitihka penerang ari Markas Pemerintahan Medan Timur Soldadu Darat madahka Panglima Medan Timur Soldadu Darat, Lt Jen Datuk Zamrose Mohd Zain udah ngatur pejalai kereja ngagai Pos Tebedu ditu ensanus.

Batang tuju pejalai Datuk Zamrose sehari nya deka meda pengawa neritka agi tikas pengelikun ba garis entara menua Sarawak – Kalimantan Barat ari ke keruga sebarang ulah ti salah.

Tu seriris enggau Atur Tagang Pejalai (PKP) Renggat Keempat dipejalai perintah dikena nagang igi penyakit Covid-19 ari majak ngerekai ba menua tu.

Tu mega dikena nagang orang ke tama enggau nadai pemendar (PATI) nengah garis entara menua kededua menua.

Kelimpah ari Tebedu, piak sida mega matau garis entara menua di Serikin, Telok Melano enggau Bunan Gega.

Mayuh batang pekara udah dikerandau rambau pejalai kereja nya kelebih agi mendingka penerang ari raban soldadu ke bejaga dia pasal gaya utai ke nyadi.

Berebak enggau nya, Datuk Zamrose mega bisi limpang ngelawa sereta berandau enggau trup beoperasyen lalu nyuaka pemeri ngagai Ketuai Penempatan.

Bela nyempulang iya rambau pejalai nya iya nya Panglima Divisyen Satu Infantri, Mej Jen Dato’ Md Din Hj Abu enggau Panglima Briged Ketiga Infantri, Brig Jen Hj Mohd Isa Jaafar.

Ba lansa bukai, Raban Rejimen 511 Askar Wataniah udah dianjung gawa mantu neritka PKP Renggat Empat ba kandang menua Kuching, Serian enggau Sri Aman.

Datuk Zamrose madah, kitai patut andalka pemutus enggau pengawa dipejalaika perintah enggau Opis Menteri Pengerai dikena nagang pengerekai igi penyakit tu.

Ku iya, pemutus ngelanjarka timpuh PKP dua minggu agi endang patut lalu kitai enda tau enda nyukung pemutus tu pulaika pengelantang pengidup semua.

“Sabar enggau seruran nitihka semua jaku gerah ari piak bekuasa ti udah dilempai bejalaika pengawa neritka atur,” ku Datuk Zamrose.

Kelimpah ari nya, program Pejalai Ngabas Pengelantang ngagai rumah Raban Volunteer Rejimen 511 Askar Wataniah (AW) udah dipejalai kena 28 April tu tadi.

Datuk Zamrose limpang ngabas ruang bilik raban Volunteer Rej 511 AW ti nyereta Ops PENAWAR seraya nyuaka pemeri ngagai sida.

Seharitu manggai hari ketiga ungkup PKP Renggat Keempat diterit berengkah ari 29 April nyentuk 12 Mei, dilanjar 12 hari agi.

Atur dipeda bisi lunggar agi ke alai Perintah Besai ngemendarka dua iku diri sebilik ulih mindah ngena sebuah kerita dibanding semina siku ketuai bilik aja sebedau tu pengudah Perintah Sarawak setuju nitihka atur ti udah digazet nya.

Taja pia mensia mayuh dipinta bela mantu enggau meri kerejasama penuh ngagai raban gawa ba luan sekumbang timpuh PKP tu Titihka atur diau jenuh ba rumah lalu anang pansut ari rumah enti nadai kebuah kelimpah seruran nyaga pemeresi diri enggau kandang ngelingi ngambi ulih nyeliah ari kena rampit igi penyakit.

Kenang mih pengiruh raban gawa ba luan baka raban soldadu, polis, PGA, staf sepital ke gawa nadai ngira jam nentuka Covid-19 jampat pukas lalu menua suman ari igi penyakit tu.