Adat Basa Pemati Iban Ulu Layar

Tusun kepenudi…

SERAK tu, Nicholas J. Ugik mai kitai bekenangka adat basa pemati Iban ba Menua Ulu Layar, adat basa pemati bechuanka atur Penghulu Asun.

Iya minta adat baruh agi ari ke udah diperambu perintah laban iya beratika bala nembiak redak iya ari Nanga Spak nyentuk Ulu Layar maya nya nadai penatai pemisi tetap sereta idup seranta.

Bepun ari nya, adat kitai adap menua Ulu Layar mit agi enti dipulai ngagai mata duit tang ripih adat agi sama enti agi ngena tajau baka sida ari Paku, Rimbas, Layar Ili enggau Batang Spak.

ATUR PENGHULU ASUN

Nicholas udah ngerandau Tuai Rumah Bantan Jerman, siku orang ti bepenemu enggau ngingatka adat kami ba Pelilih menua Layar Ulu.

Nya kebuah, Tuai Rumah Bantan endang madahka ripih tajau ke dikena orang meri adat ngagai niang sebaka enggau sida ari Rimbas, Layar Ili, Paku enggau Batang Spak.

Taja pia, enti dipulai ngagai mata duit, endang mit agi ari penyampau ke dulu dipadahka iya tadi.

Berindik ari nya, Tuai Rumah Bantan madahka adat basa tu bechuanka atur niang Penghulu Asun lalu nyadi malin ngagai rebak diatu.

Nya alai, Nicholas deka ngerintaika atur adat basa pemati ba ripih pangkat tajau.

Enti anak mit parai maya iya agi mit tang apin tumbuh ngeli lalu apai indai deka nyengai niang baka atur rabat orang besai tuai, orang nya tau ngaga ngeli iya ngena bangkang.

Tang, enti anak mit nya udah tumbuh ngeli, iya endang patut disengai ngena pengawa rabat lalu tikas adat anak mit tu bedau ulih diletak ba bansa tajau tang diletak ba sigi mata ginti. Reti iya, adat basa iya mai sigi mata ginti tauka mata duit RM0.10.

KETUAI ADAT… Tuai Rumah Benedict Sigie benung macha adat pemati niang Bujang Berani, niang Sgt. Mej. Sylvester Gargery Manggi.

RIPIH PANGKAT TAJAU

Terang Nicholas, adat menukul tu tauka enti dipulai mata duit RM0.30 suah diletak ba nembiak ke parai ari iya udah tegar bejalai nyentuk nyau deka berangkat bujang.

Sigi jabir tauka dipulai ngagai mata duit RM0.50 nya suah diletak ba menua Saribas kelebih agi tunga ke Layar, sigi jabir nya suah dikumbai sida adat bansa. Kebuah pia laban tu mih tikas adat basa orang besai tuai abis mit.

Adat tu diletak ba orang ti bedau belaki bebini ti ninggal enti iya bedau bisi ruang bilik penaik diri empu. Iya mega beridup agi begulai sejalai ba ruang bilik apai indai tauka ngelampung menyadi iya empu ke udah bisi bilik penaik kediri empu.

Sigi panding tauka pulai ngagai mata duit RM1 diletak ngagai orang ti ngembuan tikas pengidup bumai betaun nadai kala chukup asil nyentuk iya nyau minta tauka nyanda ba orang bukai lebuh abis berau.

Ba pengawa beridup bukai, sida ti suah minta tauka nyanda ba orang tu nadai tentu ngembuan pengelandik baka beranyam, bebingkai tauka ngambuh duku.

Taja pia, jeman diatu, adat basa sigi panding tu agi bepelasarka tikas pengidup siku-siku mensia.

Tiga jabir tauka alas muda enti dipulai ngagai mata berega RM1.50, adat tu ungkup ke udah belaki bebini, udah ngentak ruang bilik diri empu sereta iya mujur ba pengawa bumai betaun lalu bisi asil ke chukup diempa sida sebilik.

Kelimpah ari nya, iya ngembuan pengelandik jari ngaga perengka dikena beridup baka nganyam bebingkai, ngambuh duku enggau nempa beliung nyadi peredah.

Ba jeman diatu, enti ngembuan penatai pemisi ke ulih ngidupka diri sebilik, bisi bebelika rumah enggau entukar sereta ngembuan tikas pelajar tinggi, sida ulih mai adat basa tiga jabir.

Bekaul adat basa alas tauka dipulai ngagai mata duit RM2, sida ke mai adat basa tu baka orang ke udah bedengah nyentuk suah diambi orang ngirup jalung.

Pia mega sida ti ngembuan penemu ba pengawa asal kitai Iban baka lemambang tauka orang ti suah diinjau ba pengerami gawai besai baka Gawai Mangkung Tiang tauka Gawai Burung.

Kelimpah tikas pengidup sida tu ulih alai orang ke suntuk nyanda padi enggau nyanda berau.

Pulai ngagai dunya diatu, adat basa tu tau dikumbai kitai bekaul pemagas tauka pengeransing orang nya ngulihka pengeraja enggau nyengulaka anak sida ngambi bisi nampung bilik penaik dudi hari.

Sigi alas tu diletak enti orang nya udah dipadu nyadi Tuai Raban Bansa abis nadai nyadi Tuai Rumah enggau enti iya udah nyadi bujang berani, soldadu tauka polis.

Ba tikas pengidup, iya endang ngembuan pemisi ke ditemu orang sereta bisi ditinggal naggai peturun iya ke agi idup.

ALAS NGERANG

Enti kelia, orang ke ulih mai adat alas ngerang tauka pulai ngagai mata duit RM2.50 nya enti orang tu udah bisi dengah ngujungka iya suah diinjau orang ngirup jalung maya Gawai Antu lalu pengidup iya meruan sereta kala didinga beberita ngembuan pengeraja ditemu orang kulu kili.

Orang ke mai adat tu, pengidup iya lebih agi ari pengidup orang ti mai adat sigi alas tu. Pangkat orang ti mai alas tu pengabis iya Tuai Rumah enggau Tuai Raban Bansa.

Enti nyema tuai raban bansa tu tadi bisi pengelebih bukai baka ngembuan pengeraja ti ditemu orang kulu kili, suah dikangau orang nembuka pengawa maya bisi gawai besai tauka udah mujur nganjung bala anak besekula tinggi nyentuk bisi nampung ruang bilik ditinggalka iya, niang tu tadi ulih diletak adat basa mai alas ngerang.

Kelimpah ari nya, urang periman ke ulih mai alas ngerang tu tadi suah agi bala sida ke ngembuan pengawa dagang kediri empu ti ngujungka iya beberita ketegal pengeraja ti diulih ari pengawa dagang.

Pia mega, ari asil bedagang tu tadi iya ulih nganjung bala anak iya mujur besekula tinggi sereta bala anak iya bisi kereja enggau pangkat ke ulih nyadi pengering nampung ruang bilik.

Udahnya, orang periman ti ngembuan pemandai sekula lalu iya mangku pengawa besai bepangkat ti ngujung ke ruang pengidup iya mujur enggau beberita tu ngujungka iya diletak adat mai alas ngerang.

BESAI RETI… Adat basa pemati raban bansa Iban tebal agi bepanggai ba pemisi enggau pangkat orang ke dibasa.

RUSA

Tikas adat basa mai rusa tauka dipulai ngagai mata duit RM8 tu kita adat basa ke besai ari alas.

Enti suba, orang ke diletak adat basa tu baka tuai kayau ti matak kayau mulai lalu tuai kayau tu endang mayuh dengah nyentukka beberita kulu kili.

Ruang bilik iya mega ngembua pengeraja ti ditemu bala bukai lalu kelimpah nyadi tuai kayau ti mayuh bedengah, iya kira nyadi tuai sida ba rumah panjai tauka tuai raban bansa ba sigi-sigi menua.

Ari nya tadi, iya suah diinjau orang nembuka pengawa maya bisi gawai besai baka girup jalung tauka mai kenyalang, sebansa kayu ukir baka kenyalang lebuh bisi orang nuduka Gawai Kenyalang.

Sama mega enti Tuai Raban Bansa tu tadi bisi udah bulih menua ari pengawa ngayau mulau tauka iya udah ngempung menua lalu iya ulih diletak ngena adat basa rusa.

Ba jeman diatu, sida ke ulih diletak mai adat rusa tu baka udah dichiri nyadi tuai raban bansa baka pangkat Penghulu, Pemancha enggau Temenggung ke bisi pengidup menyana sereta bisi peturun ulih nampung ngempung ruang bilik iya.

Bala bukai ke tau mai adat tu mega baka sida udah mangku pengawa ke besai baka dipilih nyadi pengari rayat, bisi udah nerima bintang puji ari Gabenor tauka Raja berindik ari pengawa iya ke meri besai reti ngagai rayat enggau menua, bala soldadu enggau polis ti ngembuan pangkat besai sereta selalu didinga berita ngembuan tikas pengawa ti beguna ngagai mensia mayuh tauka nyaga menua.

Nambahka nya, adat basa rusa tu mega tau dibai sida ti ngembuan dagang besai ke udah ditemu rita sekayu dunya ti ngujungka iya diberi Gabenor tauka Raja bintang puji ari pengawa dagang iya ti besai sereta nyulut.

MENAGA

Adat basa menaga tauka dipulai ngagai mata duit RM16 tu kira tikas adat basa ti besai kala disebut ba menua Ulu Layar. Naka kenang tu ditulis, nadai orang ke udah mai adat menaga ba menua Ulu Layar.

Tuai Adat ngeletak orang ke mai adat tu enti iya orang dipebasa, tuai raban bansa baka bepangkat Temenggong tauka udah mangku pengawa dipilih nyadi Pengari Rayat enggau pengidup iya endang ditemu orang kulu kili ngembuan pengeraja.

Ba ujung randau seduai, dia Tuai Rumah Bantan madahka adat tu enda tau dipadam kitai ngena adat aki ini tauka orang ke udah dulu bepenemu sentang adat.

Kebuah pia laban ku Tuai Rumah Bantan, adat basa ti diletak nitihka gaya ba tubuh diri baka enti indai iya parai, enda tau enda diberi adat ari chuan pengidup bala anak uchu iya empu laban adat basa ti diletak ari perati gaya pengidup indai iya empu.

KE SANDING PENEMU

Nya alai ku Nicholas, penerang tu ditulis ngambika rebak dudi seruran ingatka adat bansa kitai ngambi enda lenyau ngapa lalu enti ditulis, sejeman mih kitai ulih meda enggau ngingatka adat tu.

Taja taun beganti taun enggau jeman beganti jeman, adat, asal enggau bansa kitai endang nyadi tanggungpengawa kitai empu ngetanka pengeraja asal kitai.