Adun Repuk ngelempungka tating belanja apai indai

SARIKEI: Nadai jaku bukai kelimpah meri terima kasih laban udah nyuaka pemeri tu, pia ku penerima bantu besekula di Dun Repok.

Pemeri baka beg, pekayan sekula enggau kasut nya diberi Adun Repok, Datuk Seri Huang Tiong Sii nengah Program Pemansang Ulah Nembiak 2020 ngagai nembiak ke datai ari ruang bilik ke kurang bepenatai pemisi ba sitak iya.

Kelimpah ari Sekula Primari (SK) Methodist Anglo- Chinese, bisi mega nerima pemeri tu iya nya nembiak ba SK St Anne, SJK Kwang Chien, SJK St Martin, SJK Kiew Mang, SJK Sze Lu enggau ke diatu SJK Su Hing.

Berebak enggau nya, apai siku nembiak, Ding Leh Hing, 30 taun madahka diri enda nyangka bulih pemeri pekayan sekula baru ungkup anak iya besekula taun baru enda lama agi.

Nambahka nya ku iya, pemeri nya ulih mantu ngelempungka tating belanja sida sebilik lebuh bepungkal bebelika barang sekula.

“Udah tentu bala anak aku berasai chukup gaga lalu sida deka belajar bebendar.

“Aku berasai chukup gaga enggau meri beterima kasih ngagai YB laban udah nyuaka bantu tu,” ku iya ngagai pemberita.

Wong Mei Mei, 38 taun madahka pemeri nya besai reti ngagai iya laban ulih mantu ngelempungka tating belanja laban iya nadai kereja tetap.

“Aku bisi kedai mit dikena nambahka penatai pemisi ditambah enggau bala anak mayuh agi besekula seraya pemeri tu endang mayuh mantu aku ari sukut ngelimatka belanja,” terang Wong.

Nya kebuah, pengari Palan Servis N.45 Repok madahka sida terus bejalaika program ngintu pengelantang bekaul pelajar dikena mantu komuniti ditu.

“Kitai ngarapka program baka tu ulih diatur dudi hari kelebih agi mantu rayat ke kurang penatai pemisi,” terang iya.

Berindik ari nya, Adun Repok mega nyuaka agih belanja RM600,000 dikena mantu ngemanah infrastruktur SJK Su Hing dalam kandang tiga taun.

Tu nyengkaum nukar perabung sekula ke udah repuk, ngaga gelanggang beperabung ungkup aktiviti lumba enggau pagar sekula nya.

Suara Sarawak