Agih RM1 bilion, 93 buah sekula repuk dikemanah

KUCHING: Urung 93 buah sekula repuk ba nengeri tu deka dikemanah ngena asil bayar RM1 bilion ngagai Perintah Sarawak ari Perintah Besai ba taun 2019 nyentuk 2020.

Menteri Kanan Infrastruktur, Datuk Seri Fadillah Yusof madah pengawa ngemanah sekula repuk nya dibagi ngagai tiga renggat.

“Pengawa mayar pinjau ungkup renggat keterubah penyampau RM350 juta digunakan dikena ngemanah 41 sekula repuk lalu diatu masuk renggat ngaga.

“Bayar ungkup renggat kedua penyampau RM350 juta agi dikan ngemanah 52 sekula repuk diatu benung ba renggat tinda,” ku iya.

Iya madah munyi nya ba aum pemberita rambau pejalai nemuai ngagai Indu Opis Kereja Raya (JKR) Sarawak ungkup keterubah iya pengudah dipaduk nyadi Menteri Kanan Infrastruktur ditu, kemari.

Fadillah ke mega Kaban Parlimen Petra Jaya madah, projek ngemanah sekula repuk ungkup renggat ketiga mungkur asil bayar pinjau RM300 juta agi bedau bisi sebarang pemutus.

“Pengawa ngemanah sekula tu mungkur pengawa ngaga baru enggau nukar kereban sekula ke udah repuk ungkup sekeda begunan.

“Ungkup taun 2020, Sarawak nadai nerima agih ari Perintah Besai dikena ngemanah sekula repuk tang kitai nguna belanja asil ari bayar pinjau RM1 bilion,” ku iya.

Suara Sarawak