Guna mih peluang tu dikena ngemansangka diri ba pengawa bedaja sereta ngelakuka pemakai
“Fama patut terus mantu raban ti muka premis baka ba Medan Niaga Satok tu ngambika tu nyadi siti chara mantu sida ngemansangka diri ba pengawa dagang.”
KUCHING: Opis Dagang Betanam Betupi Perintah Besai (Fama) patut terus ngajar sereta ngena program agro bazar nyadi siti pengawa dikena sida ngemansangka diri.
Menteri Betanam Betupi enggau Industri Asas Tani, Datuk Salahuddin Ayub madah tu siti ari peluang dikena sida bedaja sereta ngelakuka pemakai agro ti digaga ari selampur Sarawak.
“Fama patut terus mantu raban ti muka premis baka ba Medan Niaga Satok tu ngambika tu nyadi siti chara mantu sida ngemansangka diri ba pengawa dagang.
“Fama mega ba maya ti deka datai patut beratika tiap iku orang ke bedaja mit tu ngambika bisi peluang bedaja lalu ngelakuka produk sida ba agro bazar ti majak bulih palan ba selampur menua diatu,” ku iya.
Salahuddin madah munyi nya ba pengarang pemberita pengudah nemuai ngagai Bazar Ramadan Medan Niaga Satok ditu, kemari.
Nangkanka nya, Salahuddin madah iya deka terus nyukung Fama bejalaika pengawa sida.
“Ngarapka Fama deka terus meri servis ti madah ngagai sida ke bedaja ba ditu.
“Tu nyengkaum ari sukut pemeresi enggau pengelantang sereta khemah ngambika sida ulih seruran bejalaika pengawa daja sida,” ku iya.
Berebak enggau nya, Salahuddin mega ngaga pengawa nemuai meri basa ngagai Kepala Menteri Datuk Patinggi Abang Johari Tun Openg sebedau iya ngaga pengawa nemuai ngagai Medan Niaga Satok ditu, lemai tadi.
Ku iya, rambau pengawa nemuai meri basa nya, iya berandau pasal agenda ti mai ngagai pemansang menua nyengkaum Sarawak.
Kelimpah ari nya, pengudah pengawa nemuai ditu, Salahuddin ngagihka 500 iti bubur pedas ngagai mensia mayuh ti bisi ngelawa palan bedaja Medan Niaga Satok.
