KUCHING: Raban tuai ke megai menua tu dudi hari ila patut ngembuan pengelandik ba teknologi pemintar digaga (AI) ngambika ulih tetapika ubah landskap ekonomi baru.
Premier Sarawak, Datuk Patinggi Tan Sri Abang Johari Tun Openg madah, dunya kemaya hari tu majak balat ngasaika ubah bepun ari teknologi enggau AI.
Ku iya, taja AI ulih lengkas mutar penanggul, tang pengelandik mensia agi mengkang beguna dikena nentuka input enggau kuing tuju sesebengkah pemutus.
“Selalu iya enti tama kelas MBA, sekeda ari pekara ke dulu agi dipelajar iya nya baka ni napi ubah ke nyadi lalu tu siti subjek ke besai reti ba siku tuai.
“Sepemanjai idup kitai, iya ke suah nyadi iya nya ubah. Sehari tu ubah nyadi ba teknologi lalu kitai ba jeman AI alai pemutus sesebengkah penanggul ulih diputar tekala nya,” pia ku iya.
Abang Johari bejaku munyi nya ba pengawa nyain Sempekat Pemereti Ati (MoU) Institut Pengatur Sarawak (MASA) enggau The University of Melbourne (UOM) di Kompleks Kunsil Nengeri (DUN), kemari.
Taja baka nya, iya madah, AI semina nyadi kereban dikena ngerumban bulih pemutus tang pengelandik mensia mengkang nyadi batang pekara nentu pemutus digaga.
“Nyema kitai nyadi siku menijar diatu, kitai meseti landik ba AI lalu ulih melaba nama ke nyadi dudi hari,” ku iya. Abang Johari mega madah ke tuai dudi hari meseti kreatif sereta ngemeran inovatif napi ubah ke bisi nyadi. – EDISI UKAS
