KUCHING: Sarawak benung ngempung data biodiversiti ngena Artificial Intelligence (AI) dikena ngangkatka potensial ekonomi enggau aksesibiliti global.
Premier Sarawak, Datuk Patinggi Tan Sri Abang Johari Tun Openg madah, iya udah ngelempaika tanggungpengawa nya ngagai Chairman Sarawak Information Systems Sdn Bhd (SAINS), Datuk Patinggi Tan Sri Dr George Chan ngambika kompeni nya mansik pematut ngempung semua data bekaul biodiversiti planet tu.
“Keterubah, kitai patut negapka data kitai laban kitai nyadi atau dunya ari sukut kampung menua enggau biodiversiti.
“Udah nya, kitai patut ngempung data nengah AI ngambika kitai ulih bekunsi enggau dunya pasal ekonomi pengeraja asal biodiversiti.
“Reti nya, serata dunya bisi akses ngagai penerang nya lalu lebuh sida deka ngambi data nya, lalu tu ukai pechuma,” ku iya.
Abang Johari bejaku munya nya rambau Pengerami Makai Lemai Taun Baru China 2025 Kaunsil Multimedia Sarawak (SMA) di sebuah hotel kena malam tadi.
Abang Johari madah, nengeri tu mega meseti ngerejister hak enggau pengulih ba pengeraja asal biodiversiti.
Kebuah pia ku iya, nyau deka semua pekara bekaul diatu nguna AI ti nyerangkung bidang perubat kelebih agi ba jeman digital ke diatu.
Iya bekunsika peneleba lebuh nyadi pemesai ba renggat keterubah sepital pengajar Universiti Malaysia Sarawak (UNIMAS), ke alai iya meda perengka perubat ti dipejalai ba dia ngena AI ti ulih ngiga pesakit sereta ngelala penyakit.
“Perengka tu ulih ‘scan’ nuan baka kod QR. AI deka ngaga analisis tubuh nuan lalu meri peragam enti bisi utai enda betul.
“Iya ulih meri chara mutar tauka ubat ungkup penyakit nya. Nya alai, perengka enggau chara mutarka perubat mesti diberi nengah AI,” ku iya nyemetak.
Sama bisi datai Sapit Premier Sarawak, Datuk Amar Dr. Sim Kui Hian, Menteri Pengangkut, Datuk Seri Lee Kim Shin, Menteri Utiliti enggau Telekomunikesyen, Datuk Sri Julaihi Narawi, Sekretari Perintah Sarawak, Datuk Amar Mohamad Abu Bakar Marzuki, Kaban Kaunsil Direktor SMA, Datuk Seri George Chan, Menijar Besai SMA, Datuk Dr Anderson Tiong, Chairman Kolej Universiti i-CATS, Tan Sri Datuk Amar Abdul Aziz Husain enggau Konsul Besai Republik Rayat China di Kuching, Xing Weiping.
