MARUDI: Hari Raya Aidilfitri taun tu mai reti chukup berega ngagai peranak Kampung Seberang Lubok Nibong lebuh sida disambung bekal kuasa karan pengudah 40 taun nganti.
Pengaga nya tepanchar ba Pengerami Ramah Tamah Aidilfitri ti diatur kena Hari Minggu lebuh genturung pendiau ti sebedau tu petang tegayam maya malam hari diatu nyau tampak, lalu nya meri pengelantang baru ba pengidup besehari-sehari peranak.
Pengerami diatur JKKK Kampung Seberang Lubok Nibong nya mega richah enggau penatai Sapit Menteri ba Opis Premier Sarawak (Pengereja Kasar, Imigresen enggau Patau Projek) ti mega Kaban Kunsil Nengeri (ADUN) Mulu, Datuk Gerawat Gala.
Lebuh bejaku, iya madah ke sambung bekal kuasa karan ke genturung pendiau nya siti pemujur besai ti meri empas terus ngagai pengalantang peranak.
“Pengudah lebih empat puluh taun, peranak diatu nyau ngasai perengkaguna pemun tu.
Tu ukai semina ngangkatka tikas idup aja, tang ngerandang mayuh agi peluang pemansang dudi hari,” ku iya.
Iya madah baru, perengkaguna nya mega mantu ngelempung tating belanja idup, laban peranak sebedau tu bepanggai ba minyak dikena ngidupka injin api.
Berebak enggau nya, iya madah ke pengawa ngabang serimbai Aidilfitri baka nya nyadi pelasar beguna ngundang rayat enggau negap kaul entara tuai enggau komuniti menua.
Iya mega madah ke Kampung Seberang Lubok Nibong chukup nyelai laban semina siti nya aja genturung pendiau Muslim ba sitak DUN Mulu, lalu nya ngayanka pengelantang rayat pupu bansa di Sarawak. – EDISI UKAS
